തിരുവനന്തപുരം: സ്കൂള്‍ കുട്ടികളുടെ സുരക്ഷ ഉറപ്പാക്കുന്നതിന്റെ ഭാഗമായി സംസ്ഥാനത്തൊട്ടാകെ നടത്തിയ പ്രത്യേക വാഹന പരിശോധനയില്‍ മദ്യപിച്ച്‌ വാഹനം ഓടിച്ചതിന് 21 ഡ്രൈവർമാർ പിടിയിലായി.
ഇന്ന് (ഒക്ടോബർ 30) രാവിലെ 5 മണി മുതല്‍ 8 മണി വരെയാണ് സ്പെഷ്യല്‍ ഡ്രൈവ് സംഘടിപ്പിച്ചത്. സംസ്ഥാനത്തൊട്ടാകെ 4504 സ്കൂള്‍ ബസുകളാണ് പരിശോധിച്ചത്.
ഇതില്‍ പാലക്കാട്, മലപ്പുറം ജില്ലകളിലാണ് ഏറ്റവും കൂടുതല്‍ കേസുകള്‍ എടുത്തത്. അഞ്ച് വീതം കേസുകളാണ് ഈ രണ്ട് ജില്ലകളിലും.
കോട്ടയത്ത് 3 കേസുകളും, കണ്ണൂരില്‍ 2 കേസുകളും രജിസ്റ്റർ ചെയ്തിട്ടുണ്ട്.
തിരുവനന്തപുരം സിറ്റി, തിരുവനന്തപുരം റൂറല്‍, കൊല്ലം സിറ്റി, ഇടുക്കി, കൊച്ചി സിറ്റി, തൃശൂർ സിറ്റി എന്നിവിടങ്ങളില്‍ ഓരോ കേസ് വീതവും കണ്ടെത്തിയിട്ടുണ്ട്.
മദ്യപിച്ച്‌ വാഹനമോടിക്കുന്നത് റോഡ് അപകടങ്ങള്‍ക്കും മരണങ്ങള്‍ക്കും പ്രധാന കാരണമാകുന്നുവെന്നും വാഹന പരിശോധന തുടർ ദിവസങ്ങളിലും ഉണ്ടാകുമെന്നും ക്രമസമാധാന പരിപാലന വിഭാഗം എ ഡി ജി പി പി വിജയൻ അറിയിച്ചു.
