തിരുവനന്തപുരം: ശബരിമലയില് നവീകരണ പ്രവർത്തനങ്ങള് നട തുറന്ന സമയത്ത് നടത്തിയതില് ദേവസ്വം ബോർഡിനെതിരെ അതൃപ്തി പരസ്യമാക്കി ദേവസ്വം മന്ത്രി കെ.
മുരളീധരൻ. ദേവസ്വം ബോർഡ് പ്രസിഡന്റുമായി അഭിപ്രായവ്യത്യാസമുണ്ടെന്നും മന്ത്രി വ്യക്തമാക്കി.
ശബരിമല നട അടച്ചിടുന്ന സമയത്താണ് നവീകരണ പ്രവർത്തനങ്ങള് നടത്തേണ്ടതെന്ന് മന്ത്രി പറഞ്ഞു. എന്നാല് നട തുറന്ന സമയത്താണ് ഇത്തരം പ്രവർത്തനങ്ങള് നടത്തിയത്. ഇപ്പോള് തന്നെ ഇതാണ് സ്ഥിതിയെങ്കില് മണ്ഡലകാലത്ത് എന്തായിരിക്കും അവസ്ഥയെന്ന ആശങ്ക ഭക്തർക്കുണ്ടെന്നും അദ്ദേഹം പറഞ്ഞു.
ഭക്തർക്ക് യാതൊരു ബുദ്ധിമുട്ടും ഉണ്ടാകാതെ നോക്കേണ്ടത് സർക്കാരിന്റെ ഉത്തരവാദിത്തമാണ്. സർക്കാർ കാര്യങ്ങള് നിരീക്ഷിക്കുന്നുണ്ട്. ഇത്തരം കാര്യങ്ങള് മുൻകൂട്ടി കാണാൻ ദേവസ്വം ബോർഡിന് കഴിയാതിരുന്നത് വീഴ്ചയാണെന്നും മന്ത്രി വിമർശിച്ചു. ശബരിമലയില് എന്തെങ്കിലും പ്രശ്നമുണ്ടായാല് വിമർശനം ബോർഡ് പ്രസിഡന്റിനെ മാത്രമല്ല, മന്ത്രിയെയും സർക്കാരിനെയും കൂടി ബാധിക്കുമെന്നും അതിനാല് ഇത്തരം വിഷയങ്ങളില് പ്രതികരിക്കാതിരിക്കാനാകില്ലെന്നും അദ്ദേഹം വ്യക്തമാക്കി.
