ശബരിമല: ശബരിമലയിൽ അപ്പവും അരവണയും സ്റ്റോക്ക് ഉണ്ടെന്നു പറയുമ്പോഴും ഭക്തർ മണിക്കൂറുകളോളം വരിനിൽക്കേണ്ട ദുരിതത്തിലായി.
അപ്പവും അരവണയും വാങ്ങാന്‍ മണിക്കൂറുകളോളം വരിനില്‍ക്കേണ്ടി വന്നതോടെ സന്നിധാനത്ത് വലിയ പ്രതിഷേധം.
ശനിയാഴ്ച രാവിലെയോടെ അപ്പത്തിന്റെ സ്റ്റോക്കും തീര്‍ന്നു.
ആവശ്യമായ ക്രമീകരണങ്ങളെല്ലാം പൂര്‍ത്തിയാക്കിയെന്ന ദേവസ്വം ബോര്‍ഡിന്റെ അവകാശവാദത്തിനിടെയാണ് പ്രസാദ വിതരണത്തില്‍ പ്രതിസന്ധി ഉണ്ടായത്.
വെള്ളിയാഴ്ച വൈകിട്ട് നട തുറന്നതുമുതല്‍ പ്രസാദ കൗണ്ടറുകളില്‍ ഭക്തരുടെ വലിയ തിരക്കാണ് അനുഭവപ്പെട്ടത്.
ഓണ്‍ലൈന്‍ ബുക്കിങ് വഴിയുള്ള വിതരണ കൗണ്ടറുകള്‍ ഉള്‍പ്പെടെ ആറ് കൗണ്ടറുകളാണ് ഒരുക്കിയിരുന്നത്.
എന്നാല്‍ എല്ലാ കൗണ്ടറുകളിലും നീണ്ട നിര രൂപപ്പെട്ടിട്ടും കൂടുതല്‍ കൗണ്ടറുകള്‍ തുറക്കാനോ അധിക ജീവനക്കാരെ നിയോഗിക്കാനോ അധികൃതര്‍ തയ്യാറായില്ലെന്നാണ് പരാതി.
കൗണ്ടറുകളിലെ മന്ദഗതിയിലുള്ള വിതരണവും കാത്തിരിപ്പ് നീളാന്‍ കാരണമായി.
കഴിഞ്ഞ മൂന്ന് വര്‍ഷമായി ചിത്തിര ആട്ടവിശേഷത്തിന് ശബരിമലയിലെത്തുന്ന തീര്‍ഥാടകരുടെ എണ്ണത്തില്‍ വര്‍ധനവുണ്ട്.
ഇതര സംസ്ഥാനങ്ങളില്‍നിന്നുള്ള ഭക്തരുടെ എണ്ണത്തിലും വലിയ വര്‍ധനവുണ്ടായിട്ടും അതിനനുസരിച്ച് പ്രസാദം തയ്യാറാക്കി സൂക്ഷിക്കുന്നതില്‍ അധികൃതര്‍ക്ക് വീഴ്ചയുണ്ടായെന്നാണ് ഉയരുന്ന വിമര്‍ശനം.
ഒരു ദിവസം മാത്രം നട തുറന്നപ്പോഴേക്കും അപ്പത്തിന്റെ സ്റ്റോക്ക് തീര്‍ന്നത് മുന്നൊരുക്കങ്ങളുടെ അപര്യാപ്തതയാണ് ചൂണ്ടിക്കാട്ടുന്നത്.
കഴിഞ്ഞ മാസപൂജ സമയത്തും അരവണ വിതരണത്തില്‍ പ്രതിസന്ധിയുണ്ടായിരുന്നു. പ്ലാന്റിലെ അറ്റകുറ്റപ്പണികളെ തുടര്‍ന്നായിരുന്നു അന്ന് വിതരണം തടസ്സപ്പെട്ടത്.
അറ്റകുറ്റപ്പണികള്‍ പൂര്‍ത്തിയായി പ്ലാന്റ് പൂര്‍ണതോതില്‍ പ്രവര്‍ത്തനസജ്ജമായാല്‍ പ്രതിദിനം മൂന്നരലക്ഷം ടിന്‍ അരവണ ഉത്പാദിപ്പിക്കാനാകുമെന്ന് ദേവസ്വം ബോര്‍ഡ് പ്രസിഡന്റ് നേരത്തെ വ്യക്തമാക്കിയിരുന്നു.
എന്നാല്‍ ചിത്തിര ആട്ടവിശേഷ സമയത്തും പ്രസാദ വിതരണത്തിലെ തിരക്ക് നിയന്ത്രിക്കാന്‍ ബോര്‍ഡിന് കഴിഞ്ഞില്ല.
തുലാമാസ പൂജയ്‌ക്കും ചിത്തിര ആട്ടവിശേഷത്തിനും അനുഭവപ്പെട്ട തിരക്ക് മണ്ഡലകാലത്തേക്കുള്ള മുന്നൊരുക്കങ്ങളില്‍ കൂടുതല്‍ ജാഗ്രത വേണമെന്ന മുന്നറിയിപ്പാണ് നല്‍കുന്നത്.
നവംബര്‍ 16ന് മണ്ഡലകാലത്തിനായി വീണ്ടും നട തുറക്കാനിരിക്കെ പ്രസാദ ഉത്പാദനവും വിതരണവും കൂടുതല്‍ കാര്യക്ഷമമാക്കേണ്ടത് ദേവസ്വം ബോര്‍ഡിന് മുന്നിലെ പ്രധാന വെല്ലുവിളിയാണ്.
നിലവിലെ പ്രതിസന്ധിയില്‍ ഭക്തര്‍ക്കിടയില്‍ പ്രതിഷേധവും ശക്തമാണ്.
