കോട്ടയം : ശബരിമല മണ്ഡല മകരവിളക്ക് മഹോത്സവത്തിന് മുന്നോടിയായി ജില്ലയില്‍ നടന്നുവരുന്ന തയ്യാറെടുപ്പുകള്‍ കളക്ടർ ചേതൻകുമാർ മീണയുടെ അദ്ധ്യക്ഷതയില്‍ ചേർന്ന യോഗം വിലയിരുത്തി.
എരുമേലിയിലെയും ജില്ലയിലെ ഇടത്താവളങ്ങളിലെയും ക്രമീകരണങ്ങള്‍ ചർച്ച ചെയ്തു. വിവിധ വകുപ്പുകളുടെയും സ്ഥാപനങ്ങളുടെയും നേതൃത്വത്തില്‍ നടന്നുവരുന്ന പ്രവർത്തനങ്ങള്‍ മേധാവികള്‍ വിശദീകരിച്ചു. തീർത്ഥാടകരുടെ സുരക്ഷ, ഗതാഗത ക്രമീകരണം, പാർക്കിംഗ് തുടങ്ങിയവ കുറ്റമറ്റ രീതിയില്‍ നടപ്പാക്കുമെന്ന് ജില്ലാ പൊലീസ് മേധാവി കെ.എം സാബു മാത്യു അറിയിച്ചു. കാനന പാത അടച്ചാല്‍ കോയിക്കല്‍കാവില്‍ തങ്ങേണ്ടിവരുന്ന തീർത്ഥാടകർക്ക് മതിയായ സൗകര്യങ്ങളൊരുക്കും. ശബരിമല തീർത്ഥാടനവുമായി ബന്ധപ്പെട്ട എല്ലാ റോഡുകളുടെയും അറ്റകുറ്റപ്പണികള്‍ സമയബന്ധിതമായി പൂർത്തീകരിക്കുന്നതിന് നിർദ്ദേശം നല്‍കി. അപകട സാദ്ധ്യതയുള്ള മേഖലകളില്‍ മുന്നറിയിപ്പ് ബോർഡുകള്‍ സ്ഥാപിക്കും. തീർത്ഥാടകർ എത്തിച്ചേരുന്ന എല്ലാ സ്ഥലങ്ങളിലും കച്ചവടക്കാർ ഭക്ഷണസാധനങ്ങളുടെ വിലവിവരപ്പട്ടിക പ്രദർശിപ്പിക്കുന്നുണ്ടെന്ന് ഉറപ്പാക്കാൻ ജില്ലാ സപ്ലൈ ഓഫീസറെ ചുമതലപ്പെടുത്തി. എരുമേലിയിലും മറ്റ് ഇടത്താവളങ്ങളിലും ഭക്ഷ്യ സുരക്ഷാ വകുപ്പിന്റെ കർശന പരിശോധനാ സംവിധാനം. മാലിന്യനിർമാർജ്ജനം നടപ്പാക്കുന്നതിന് ഗ്രാമപഞ്ചായത്തും ബന്ധപ്പെട്ട വകുപ്പുകളും സംയുക്ത യോഗം ചേർന്ന് തീരുമാനമെടുക്കും. ഇടത്താവളങ്ങളില്‍ ശുദ്ധജലം, സാനിട്ടേഷൻ സൗകര്യങ്ങള്‍, വെളിച്ചം എന്നിവ ദേവസ്വം ബോർഡ് ഉറപ്പാക്കും.
താത്കാലിക ഡിസ്‌പെൻസറികള്‍
എരുമേലി ദേവസ്വം ബോർഡ് ഗ്രൗണ്ട്, കാളകെട്ടി എന്നിവിടങ്ങളില്‍ താത്കാലിക ഡിസ്‌പെൻസറികളും ഇടത്താവളങ്ങളില്‍ മെഡിക്കല്‍ എയ്ഡ് കൗണ്ടറുകള്‍
എല്ലാ കേന്ദ്രങ്ങളിലും ആവശ്യത്തിന് ജീവനക്കാരുടെ സേവനം, തീർത്ഥാടന പാതകളില്‍ മൊബൈല്‍ മെഡിക്കല്‍ ടീം പട്രോളിംഗ്
കുളിക്കടവുകളില്‍ ലൈഫ് ഗാർഡുകളെ നിയോഗിക്കും. ഇവർക്ക് അഗ്‌നിശമനസേന പരിശീലനം നല്‍കും. എരുമേലിയില്‍ താത്കാലിക ഫയർ സ്റ്റേഷനും പ്രത്യേക യൂണിറ്റും.
ശുദ്ധജല വിതരണം ഉറപ്പാക്കും, കാനന പാതയില്‍ ലൈറ്റുകള്‍ സ്ഥാപിക്കുന്ന ജോലികള്‍ സമയബന്ധിതമായി പൂർത്തീകരിക്കും
