കൊച്ചി: യുവനടിയുടെ ബന്ധുവിനെ പീഡിപ്പിച്ചെന്ന കേസില്‍ ഡോ. ജോണ്‍സണ്‍ കെ വർ‌ഗീസിനെതിരെ നിർണായക വെളിപ്പെടുത്തലുമായി യുവനടി.
പീഡന പരാതി ഒതുക്കി തീർക്കാൻ ജോണ്‍സണ്‍ ഒരു കോടി രൂപ വാഗ്ദാനം ചെയ്തതായി ഡോക്ടറെ മർദിച്ച കേസില്‍ പിടിയിലായ യുവ നടി പൊലീസിന് മൊഴി നല്‍കി.
വാഗ്ദാനം നിരസിച്ചതോടെയാണ് ഡോക്ടർ പൊലീസിന് പരാതി നല്‍കിയത്. ഡോക്ടറുടെ ഫോണ്‍ തിരികെ നല്‍കാതിരുന്നത് തെളിവുകള്‍ നശിപ്പിക്കാതിരിക്കാനാണെന്നും ബന്ധുവായ പരാതിക്കാരി വഴി ഫോണ്‍ പൊലീസിന് കൈമാറാനായിരുന്നു ലക്ഷ്യമെന്നും യുവനടി ചോദ്യം ചെയ്യലില്‍ വെളിപ്പെടുത്തി.
ഡോക്ടറെ മർദിച്ച കേസില്‍ നടൻ വിപിൻ പെരുമ്പള്ളി, യുവനടി, വിഷ്ണു എന്നിവരാണ് കസ്റ്റഡിയിലുള്ളത്. അതേസമയം, കേസില്‍ ഒളിവില്‍ കഴിയുന്ന ഡോ. ജോണ്‍സണ്‍ കെ വർഗീസ് കഴിഞ്ഞദിവസം മുൻകൂർ ജാമ്യാപേക്ഷ നല്‍കിയിരുന്നു. പരാതിക്കാരിയുടെ കുടുംബ ഡോക്ടറാണ് താനെന്നും പരാതിക്കാരിയുമായി നല്ല ബന്ധമാണെന്നും യുവനടി മൂന്ന് കോടി ആവശ്യപ്പെട്ട് നഗ്നനാക്കി മർദിച്ചുവെന്നുമാണ് മുൻകൂർ ജാമ്യാപേക്ഷയിലുള്ളത്.
തന്നെ മർദിച്ചെന്ന് പരാതിയുടെ പ്രതികാരമായാണ് തനിക്കെതിരെ പീഡനപരാതി നല്‍കിയതെന്നാണ് ഡോക്ടറുടെ ആരോപണം. ഒക്ടോബർ പത്തിന് നടന്നതായി പറയുന്ന സംഭവത്തില്‍ നവംബർ നാലിന് ശേഷമാണ് പരാതിക്കാരി പൊലീസിനെ സമീപിച്ചത്. നവംബർ നാലിന് കടവന്ത്ര പൊലീസ് സ്റ്റേഷനില്‍ താൻ നല്‍കിയ പരാതിയില്‍ കേസെടുത്തതിന് ശേഷമാണ് പീഡന പരാതി ഉയർന്നത്. തനിക്കെതിരായ കേസ് പ്രതികാര നടപടിയാണോയെന്ന് പരിശോധിക്കണമെന്നും മുൻകൂർ ജാമ്യ ഹർജിയില്‍ ഡോ ജോണ്‍സണ്‍ ആവശ്യപ്പെട്ടു.
