കണ്ണൂര്‍: മട്ടന്നൂരില്‍ വീട്ടിനുള്ളില്‍ അമ്മയേയും മകനേയും വെട്ടേറ്റ് മരിച്ച നിലയില്‍ കണ്ടെത്തിയ സംഭവത്തില്‍ കൂടുതല്‍ വിവരങ്ങള്‍ പുറത്ത്.
അമ്മയും മകനും തമ്മിലുണ്ടാകാറുള്ള സ്വാഭാവിക വഴക്കായിരിക്കുമെന്ന് കരുതി രാവിലെയുണ്ടായ ഒച്ചപ്പാടുകള്‍ ശ്രദ്ധിച്ചില്ലെന്നും, സംഭവം ഞെട്ടിച്ചുകളഞ്ഞെന്നും അയല്‍വാസികള്‍ പ്രതികരിച്ചു. മരിച്ച ജ്യോതിയുടെ ഭര്‍ത്താവ് ജയകൃഷ്ണന്റെ ഉച്ചത്തിലുള്ള നിലവിളി കേട്ട് വീട്ടിലേക്ക് ഓടിച്ചെന്നപ്പോള്‍ രക്തത്തില്‍ കുളിച്ച നിലയില്‍ രണ്ട് പേരും നിലത്ത് വീണ് കിടക്കുകയായിരുന്നെന്നാണ് അയല്‍വാസിയുടെ പ്രതികരണം.
തൊട്ടടുത്ത് നിന്ന് ഒരു കത്തി കണ്ടെടുത്തതായും, ഇരുവരെയും ഉടനടി ആശുപത്രിയിലേക്ക് കൊണ്ടുപോയതായും നാട്ടുകാര്‍ വ്യക്തമാക്കി. ഉടന്‍ തൊട്ടടുത്തുള്ള ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായിരുന്നില്ല.
'അമ്മയുടേയും മകന്റേയും മൃതദേഹങ്ങള്‍ വീടിന്റെ രണ്ടാം നിലയില്‍ അടുത്തടുത്തായി കിടപ്പുണ്ടായിരുന്നു. ജയകൃഷ്ണന്റെ കരച്ചില്‍ കേട്ടാണ് ഓടിച്ചെന്നത്. സമീപത്തായി ഒരു കത്തിയും ഉണ്ടായിരുന്നു.
രണ്ടുപേരുടേയും കൈ പിടിച്ച്‌ നോക്കിയപ്പോള്‍ പള്‍സ് കിട്ടുന്നുണ്ടായിരുന്നില്ല. രക്തം കട്ടപിടിച്ചുകിടക്കുകയാണെന്നാണ് അറിയാനായത്. പൊലീസ് എത്തിയിട്ട് ബോഡിയെടുത്താല്‍ മതിയെന്നൊക്കെ ചിലർ പറയുന്നുണ്ടായിരുന്നു.' അയല്‍വാസി പ്രതികരിച്ചു.
അമ്മയും മകനും തമ്മില്‍ മുന്‍പും ഉച്ചത്തിലുള്ള വഴക്കുകള്‍ ഉണ്ടാകാറുണ്ടെന്നും, ഇതും അതുപോലെയായിരിക്കുമെന്നാണ് കരുതിയതെന്നും അദ്ദേഹം കൂട്ടിച്ചേര്‍ത്തു.
ഇന്ന് രാവിലെ പത്ത് മണിയോടെയാണ് മട്ടന്നൂര്‍ സ്വദേശികളായ ജ്യോതിയെയും മകന്‍ നവീനെയും വീട്ടിനുള്ളിലെ രണ്ടാം നിലയില്‍ മരിച്ച നിലയില്‍ കണ്ടെത്തിയത്. മരിച്ച ജ്യോതി റിട്ടയേര്‍ഡ് അധ്യാപികയാണ്.
മകന്‍ നവീന്‍ പ്രകൃതിയില്‍ കോച്ചിങ് ക്ലാസിന് പോകുന്നയാളാണെന്നും, മൂത്ത മകന്‍ എറണാകുളത്ത് ജോലിയുമായി ബന്ധപ്പെട്ട് താമസിക്കുകയാണെന്നും അയല്‍വാസി പറഞ്ഞു.
