ഡൽഹി: ഇന്ത്യൻ സിനിമയിലെ ഏറ്റവും വലിയ ചലച്ചിത്ര പദ്ധതികളിലൊന്നായി വിശേഷിപ്പിക്കപ്പെടുന്ന നമിത് മല്‍ഹോത്രയുടെ 'രാമായണം' ആഗോള റിലീസിന് ഒരുങ്ങുന്നു.
നിതേഷ് തിവാരി സംവിധാനം ചെയ്യുന്ന ചിത്രം 100-ലധികം രാജ്യങ്ങളിലായി 50,000 സ്‌ക്രീനുകളില്‍ പ്രദർശിപ്പിക്കാനാണ് ലക്ഷ്യമിടുന്നത്. ഇന്ത്യയുടെ സമ്പന്നമായ സാംസ്‌കാരിക പൈതൃകവും ഇതിഹാസ പാരമ്പര്യവും ലോകമെമ്പാടുമുള്ള പ്രേക്ഷകരിലേക്ക് എത്തിക്കുകയാണ് ചിത്രത്തിന്റെ ലക്ഷ്യം.
ചിത്രത്തിന്റെ വൻ നിർമാണച്ചെലവ്, ദൃശ്യവിസ്മയം, പ്രമുഖ താരനിര എന്നിവ ഇതിനകം തന്നെ സിനിമാപ്രേമികള്‍ക്കിടയില്‍ വലിയ പ്രതീക്ഷകള്‍ സൃഷ്ടിച്ചിട്ടുണ്ട്. ഇന്ത്യയ്ക്ക് പുറത്തുള്ള വിപണികളിലും വിപുലമായ പ്രേക്ഷകശ്രദ്ധ നേടുകയെന്ന ലക്ഷ്യത്തോടെയാണ് രാജ്യാന്തര വിതരണ പദ്ധതികള്‍ ഒരുക്കിയിരിക്കുന്നത്. ഇത്രയധികം സ്‌ക്രീനുകളില്‍ ചിത്രം പ്രദർശിപ്പിക്കുന്നതിലൂടെ രാമായണത്തിന്റെ കഥ ആഗോളതലത്തില്‍ വലിയ തിരശ്ശീലയില്‍ ആസ്വദിക്കാൻ പ്രേക്ഷകർക്ക് അവസരമൊരുങ്ങും.
നമിത് മല്‍ഹോത്രയുടെ പ്രൈം ഫോക്കസ് സ്റ്റുഡിയോസ്, എട്ട് ഓസ്‌കാർ പുരസ്‌കാരങ്ങള്‍ നേടിയ വിഷ്വല്‍ ഇഫക്‌ട്‌സ് കമ്പനിയായ ഡി.എൻ.ഇ.ജി. (DNEG), യാഷിന്റെ മോണ്‍സ്റ്റർ മൈൻഡ് ക്രിയേഷൻസ് എന്നിവ ചേർന്നാണ് ചിത്രം നിർമിക്കുന്നത്. ഇന്ത്യയ്ക്ക് പുറത്തുള്ള രാജ്യങ്ങളില്‍ സോണി പിക്ചേഴ്സിനാണ് വിതരണച്ചുമതല. ഹിന്ദി സംസാരിക്കുന്ന വിപണിയില്‍ ധർമ പ്രൊഡക്ഷൻസും ചിത്രം വിതരണം ചെയ്യും.
രാമായണം': താരനിരയും റിലീസ് തീയതിയും
ചിത്രത്തില്‍ ശ്രീരാമനായി രണ്‍ബീർ കപൂറും സീതയായി സായ് പല്ലവിയും രാവണനായി യാഷും വേഷമിടുന്നു. സണ്ണി ഡിയോള്‍ ഹനുമാനായും രവി ദുബെ ലക്ഷ്മണനായും എത്തുന്നു.
രണ്ട് ഭാഗങ്ങളിലായി ഒരുങ്ങുന്ന ചിത്രം ഹിന്ദി, തമിഴ്, തെലുങ്ക്, കന്നഡ, മലയാളം ഭാഷകളില്‍ പുറത്തിറങ്ങും. ഐമാക്സ് (IMAX) പതിപ്പും പ്രദർശനത്തിനെത്തിക്കാനാണ് അണിയറപ്രവർത്തകരുടെ പദ്ധതി.
ചിത്രത്തിന്റെ ഒന്നാം ഭാഗം 2026 നവംബർ 5ന് ആഗോളതലത്തില്‍ റിലീസ് ചെയ്യാനാണ് തീരുമാനിച്ചിരിക്കുന്നത്. രണ്ടാം ഭാഗം 2027-ലെ ദീപാവലി സമയത്ത് പുറത്തിറക്കാനും പദ്ധതിയുണ്ട്.
പ്രദർശനത്തിന് മുൻപേ മികച്ച പ്രതികരണം
അടുത്തിടെ ലോസ് ഏഞ്ചല്‍സില്‍ നടന്ന ചിത്രത്തിന്റെ പ്രീമിയറിനു പിന്നാലെ ദൃശ്യാവിഷ്‌കാരം, വിഷ്വല്‍ ഇഫക്‌ട്‌സ്, വൈകാരിക രംഗങ്ങള്‍, താരങ്ങളുടെ പ്രകടനം എന്നിവയെ പ്രശംസിച്ച്‌ പ്രേക്ഷകർ രംഗത്തെത്തിയതായി റിപ്പോർട്ടുകള്‍ പറയുന്നു.
രാമായണം: റൈസ് ഓഫ് എ ലെജൻഡ്' അതിഗംഭീരമായ
അനുഭവമായിരുന്നുവെന്നാണ് ഒരു പ്രേക്ഷകന്റെ പ്രതികരണം. ചിത്രത്തിലെ ദൃശ്യങ്ങള്‍, നൃത്തങ്ങള്‍, സംഗീതം, ആക്ഷൻ രംഗങ്ങള്‍ എന്നിവയെ പ്രശംസിച്ച അദ്ദേഹം രണ്‍ബീർ കപൂറിന്റെ പ്രകടനം മികച്ചതായിരുന്നെന്നും യാഷിന്റെ അഭിനയം ഏറെ ആകർഷിച്ചെന്നും അഭിപ്രായപ്പെട്ടു. ഈ വർഷത്തെ മികച്ച സിനിമാനുഭവങ്ങളിലൊന്നായാണ് ചിത്രത്തെ അദ്ദേഹം വിശേഷിപ്പിച്ചത്.
ആദ്യദിന കളക്ഷൻ 200 കോടി രൂപയാകുമെന്ന് പ്രതീക്ഷ
റിലീസ് ദിനത്തില്‍ ആഗോള ബോക്സ് ഓഫീസില്‍ ചിത്രം ഏകദേശം 200 കോടി രൂപ നേടുമെന്നാണ് റിപ്പോർട്ടുകള്‍ സൂചിപ്പിക്കുന്നത്. വിപുലമായ രാജ്യാന്തര റിലീസും വൻ താരനിരയും ചിത്രത്തിന്റെ ബോക്സ് ഓഫീസ് പ്രകടനത്തില്‍ നിർണായകമാകുമെന്നാണ് വിലയിരുത്തല്‍.
