ഡല്‍ഹി: ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി വീണ്ടും വിദേശത്തേക്ക് പോവുന്നെന്ന ആരോപണവുമായി ബിജെപി.
ഈ മാസം 16 നും 19 നും ഇടയില്‍ രാഹുല്‍ ഗാന്ധി അമേരിക്കയിലേക്ക് പോകാൻ പദ്ധതിയിടുന്നതായും ഇത് അരാജകവാദികള്‍ക്കൊപ്പമുള്ള മറ്റൊരു അവധി ആഘോഷമാണെന്നും ബിജെപി നേതൃത്വം കുറ്റപ്പെടുത്തി.
മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ടുള്ള സമരത്തിനിടെ കഴിഞ്ഞ മാസം തായ്‌ലൻഡ് സന്ദർശിച്ചത് വിവാദമായിരുന്നു.
ഇന്നലെയാണ് രാഹുല്‍ ഗാന്ധിയുടെ വിദേശ ബന്ധവും വിദേശ സന്ദർശനവും അടക്കം കോണ്‍ഗ്രസിനും ബിജെപിക്കുമിടയില്‍ ആരോപണ പ്രത്യാരോപണത്തിന് ഇടയാക്കിക്കൊണ്ട് ഉയർന്നുവന്നത്. പ്രധാനമന്ത്രിയുടെ വിദേശസന്ദർശനങ്ങള്‍ ചൂണ്ടിക്കാട്ടി മോദിക്ക് വിദേശശക്തികളുടെ പിന്തുണയെന്ന ആരോപണവുമായി രാഹുല്‍ ഗാന്ധിയാണ് ഈ തർക്കത്തിന് തിരികൊളുത്തിയത്. ഇതിനുപിന്നാലെ രാഹുല്‍ഗാന്ധിയുടെ വിദേശസന്ദർശനങ്ങളില്‍ ദുരൂഹത ആരോപിച്ച്‌ ബിജെപി രംഗത്ത് വന്നു. ഏറ്റവുമൊടുവില്‍ പ്രദീപ് ഭണ്ഡാരി (ബിജെപി വക്താവ്)യാണ് രാഹുല്‍ ഗാന്ധിക്ക് എതിരെ രംഗത്ത് വന്നത്.
രാഹുല്‍ ഗാന്ധിക്ക് രാജ്യത്ത് നില്‍ക്കാൻ സമയമില്ല. വോട്ട് ചോരിയല്ല മറിച്ച്‌ സ്വന്തം ദൗർബല്യങ്ങളാണ് രാഹുല്‍ ഗാന്ധിക്ക് പ്രധാനമെന്നും അദ്ദേഹം ആരോപണത്തില്‍ കൂട്ടിച്ചേർത്തിരുന്നു. പ്രധാനമന്ത്രിയുടെ വിദേശയാത്ര സുതാര്യമെന്നും രാഹുല്‍ ഗാന്ധിയുടേത് ദുരൂഹമെന്നും ബിജെപി നേതാക്കള്‍ ആരോപിക്കുന്നു.
