കൊച്ചി: പെരുമ്പാവൂരില്‍ പോക്‌സോ കേസില്‍ ജാമ്യത്തിലിറങ്ങിയ പ്രതി അതിജീവിതയുടെ വീട്ടില്‍ അതിക്രമിച്ച്‌ കയറി കഴുത്തറുത്ത് കൊല്ലാന്‍ ശ്രമിച്ചു.
അതിക്രമത്തിനിടെ പെണ്‍കുട്ടിയുടെ രണ്ട് കൈകള്‍ക്കും സാരമായി പരിക്കേറ്റു. തടയാന്‍ ശ്രമിച്ച നാട്ടുകാരിലൊരാള്‍ക്കും ആക്രമണത്തില്‍ പരിക്കേറ്റിട്ടുണ്ട്. സംഭവത്തില്‍ അറയ്ക്കപ്പടി പെരുമാനി സ്വദേശിയായ മുഹമ്മദ് അദ്‌നാനെ പെരുമ്പാവൂര്‍ പോലീസ് അറസ്റ്റ് ചെയ്തു.
തിങ്കളാഴ്ച ഉച്ചയ്ക്ക് രണ്ടരയോടെയാണ് സംഭവം നടന്നത്. പെണ്‍കുട്ടിയുടെ വീട്ടില്‍ അതിക്രമിച്ച്‌ കയറിയ പ്രതി, കുട്ടിയെ വലിച്ചിഴച്ച്‌ മുറ്റത്തെത്തിച്ച ശേഷം കത്തി ഉപയോഗിച്ച്‌ കഴുത്തറുത്ത് കൊല്ലാന്‍ ശ്രമിക്കുകയായിരുന്നു. ആക്രമണം പെണ്‍കുട്ടി തടയാന്‍ ശ്രമിക്കുന്നതിനിടയിലാണ് രണ്ട് കൈകള്‍ക്കും മുറിവേറ്റത്. യുവാവിന്റെ ആക്രമണം കണ്ട് ഓടിക്കൂടിയ നാട്ടുകാരില്‍ ചിലര്‍ ഇയാളെ തടയാന്‍ ശ്രമിച്ചതോടെയാണ് വലിയൊരു അത്യാഹിതം ഒഴിവായത്. ഈ ശ്രമത്തിനിടയിലാണ് നാട്ടുകാരിലൊരാള്‍ക്കും കത്തികൊണ്ടുള്ള ആക്രമണത്തില്‍ പരിക്കേറ്റത്.
വിവരമറിഞ്ഞ് പെരുമ്പാവൂര്‍ പോലീസ് സ്ഥലത്തെത്തുമ്പോഴേക്കും പ്രതി അദ്‌നാന്‍ ഓടി രക്ഷപ്പെട്ടിരുന്നു. തുടര്‍ന്ന് പരിസരപ്രദേശങ്ങളില്‍ പോലീസ് നടത്തിയ തിരച്ചിലില്‍ അടുത്തുള്ള കുറ്റിക്കാട്ടില്‍ നിന്നും ഏറെ സാഹസികമായാണ് ഇയാളെ കസ്റ്റഡിയിലെടുത്തത്. കോടതിയില്‍ ഹാജരാക്കിയ പ്രതിയെ നിലവില്‍ റിമാന്‍ഡ് ചെയ്തിട്ടുണ്ട്.
കഴിഞ്ഞ ഓഗസ്റ്റ് മാസത്തില്‍ പെണ്‍കുട്ടിയോട് മോശമായി പെരുമാറിയതിനെത്തുടര്‍ന്നാണ് മുഹമ്മദ് അദ്‌നാനെതിരെ പോക്‌സോ കേസ് രജിസ്റ്റര്‍ ചെയ്യുന്നത്. ഈ കേസില്‍ റിമാന്‍ഡിലായിരുന്ന ഇയാള്‍ കഴിഞ്ഞ മാസം 18-ാം തീയതിയാണ് ജാമ്യത്തിലിറങ്ങിയത്. ജാമ്യത്തിലിറങ്ങിതിന് പിന്നാലെയാണ് അതിജീവിതയെ തേടിയെത്തി വീണ്ടും അപായപ്പെടുത്താന്‍ പ്രതി ശ്രമം നടത്തിയത്.
