തിരുവനന്തപുരം: പ്രിയദർശിനി സൗജന്യയാത്രാ പദ്ധതി മൂലമുള്ള പ്രതിസന്ധികള്‍ പരിഹരിക്കണമെന്നാവശ്യപ്പെട്ട് സംസ്ഥാനത്തെ സ്വകാര്യ ബസ്സുടമകള്‍ അനിശ്ചിതകാല സമരത്തിലേക്ക്.
ഇതിന്റെ ആദ്യഘട്ടമായി കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്സ് ഫെഡറേഷന്റെ നേതൃത്വത്തില്‍ ഒക്ടോബർ 14ന് സെക്രട്ടേറിയറ്റിലേക്ക് മാർച്ചും ധർണയും നടത്തും.
പ്രിയദർശിനി ബസുകള്‍ സർവീസ് നടത്തുന്ന റൂട്ടുകളില്‍ ഡീസല്‍ ചെലവിനും ജീവനക്കാർക്ക് മാന്യമായ വേതനം നല്‍കുന്നതിനും ആവശ്യമായ വരുമാനം ലഭിക്കുന്നില്ലെന്നാണ് ഫെഡറേഷന്റെ പ്രധാന പരാതി.
സ്വകാര്യ ബസ് മേഖലയെ സംരക്ഷിക്കുന്നതിനായി സർക്കാരിനും പത്മകുമാർ ഐ.പി.എസ് അധ്യക്ഷനായ വിദഗ്ധസമിതിക്കും മുന്നില്‍ മൂന്ന് പാക്കേജുകള്‍ സമർപ്പിച്ചിരുന്നുവെങ്കിലും അനുകൂല നടപടിയുണ്ടായിട്ടില്ലെന്ന് ഭാരവാഹികള്‍ വ്യക്തമാക്കി.
റൂട്ട് പെർമിറ്റുള്ള സ്വകാര്യ ബസുകള്‍ വാടകയ്ക്കെടുത്ത് സർവീസ് നടത്താമെന്ന വിദഗ്ധസമിതിയുടെ ശുപാർശയിലും തീരുമാനമായിട്ടില്ല.
