കൊച്ചി ; കാലടി ശ്രീശങ്കരാചാര്യ സംസ്‌കൃത സർവകലാശാലയിലെ വിദ്യാർഥി പ്രക്ഷോഭത്തില്‍ സർവകലാശാലാ അധികൃതർക്കം സംസ്ഥാന സർക്കാരിനുമെതിരെ രൂക്ഷവിമർശനവുമായി നടന്‍ പ്രകാശ് രാജ്.
കാവിവല്‍ക്കരണവും, സ്വേച്ഛാധിപത്യവുമാണ് സിസ തോമസ് നടത്തുന്നതെന്നാണ് പ്രകാശ് രാജ് മാധ്യമങ്ങളോട് പറഞ്ഞത് . വിദ്യാർഥികള്‍ എന്തിന് മാപ്പ് പറയണം . ഉന്നത വിദ്യാഭ്യാസ മന്ത്രി സ്വന്തം നിലവാരം കാത്തുസൂക്ഷിക്കണം. ഇത് നിങ്ങളുടെ മണ്ഡലമാണ്. രാജ്യത്തെ വിദ്യാര്‍ത്ഥികള്‍ക്കൊപ്പം നില്‍ക്കാന്‍ മന്ത്രി ശ്രമിക്കണം. ജനപ്രതിനിധി കൂടിയായ വിദ്യാഭ്യാസ മന്ത്രി വിഷയത്തില്‍ ഇടപെട്ട് പ്രശ്നപരിഹാരത്തിന് മുൻകയ്യെടുക്കണം. വിദ്യാർഥികള്‍ക്കൊപ്പം നില്‍ക്കേണ്ട മന്ത്രി എന്തിനാണ് സർവകലാശാലാ അധികൃതരെ പിന്തുണയ്‌ക്കുന്നതെന്നുമാണ് പ്രകാശ് രാജിന്റെ ചോദ്യം.
ഇങ്ങനെയല്ല കുട്ടികളെ കൈകാര്യം ചെയ്യേണ്ടത് . തന്നെ ശാരീരികമായി ആക്രമിക്കാന്‍ ശ്രമിച്ചെന്ന വൈസ് ചാന്‍സലറുടെ ആരോപണം വെറും നാടകമാണ്. കുട്ടികള്‍ നാടക വിദ്യാര്‍ത്ഥികളാണ് അവര്‍ നാടകം കളിക്കട്ടെ, വി സി എന്തിനാണ് പുതിയ തിരക്കഥ ഉണ്ടാക്കി നാടകം കളിക്കുന്നത് . ഈ വിഷയം ഉടനെ പരിഹരിക്കണം. സമരം നീണ്ട് പോവുകയാണെങ്കില്‍ താന്‍ ഇവിടെ വന്ന് കുട്ടികള്‍ക്കൊപ്പം നിരാഹാരം ഇരിക്കുമെന്നും പ്രകാശ് രാജ് പറഞ്ഞു.
