കൊച്ചി: മാസപ്പടി കേസില്‍ പ്രതിപക്ഷ നേതാവ് പിണറായി വിജയനെതിരെ കേസെടുത്തതിനെ പരിഹസിച്ച്‌ മുൻ മന്ത്രി പി രാജീവ്.
എഫ്‌ഐആർ വേണോ എന്ന് തീരുമാനിക്കേണ്ടത് കോടതിയല്ല. അത് അന്വേഷണ ഉദ്യോഗസ്ഥൻ്റെ സ്വാതന്ത്ര്യം ആണെന്നും അതിലാണ് കോടതി കൈകടത്തിയതെന്നും പി രാജീവ് പറഞ്ഞു.
കേസില്‍ ഉള്‍പ്പെടുന്ന കക്ഷികള്‍ക്ക് ഒരു നോട്ടിസ് പോലും നല്‍കിയില്ല. ഇതിലെ രാഷ്ട്രീയം കോണ്‍ഗ്രസ്‌ മനസിലാക്കുന്നില്ലെന്നും ബിജെപിക്ക് വിധേയമാകാനാണ് കേരളത്തിലെ കോണ്‍ഗ്രസ്‌ ശ്രമിക്കുന്നതെന്നും അദ്ദേഹം വിമർശിച്ചു.
രാജ്യമാകെ എസ്‌ഐആർ ക്രമക്കേടില്‍ പ്രതിഷേധം ശക്തമാകുമ്പോള്‍ ഇവിടെ എഫ്‌ഐആറിലാണ് ശ്രദ്ധയെന്നും ഇതിന് പിന്നില്‍ ബിജെപി ഡീല്‍ ആണെന്നും രാജീവ് ആരോപിച്ചു. ഡൽഹി സമരത്തില്‍ മറ്റ് കോണ്‍ഗ്രസ്‌ മുഖ്യമന്ത്രിമാർ സജീവമായി പങ്കെടുക്കുമ്പോള്‍ കേരള മുഖ്യമന്ത്രി രാഹുല്‍ ഗാന്ധിയെ സ്റ്റേഷനില്‍ സന്ദർശിച്ച്‌ മടങ്ങുകയായിരുന്നു.
കേസിന് പിന്നില്‍ ബിജെപി ഡീല്‍ അല്ലാതെ എന്താണ് എന്ന് ചോദിച്ച പി രാജീവ് നാളെ രാഹുല്‍ ഗാന്ധിക്ക് എതിരെ ഇഡി ഒരു റിപ്പോർട്ട്‌ എവിടെയെങ്കിലും കൊടുത്താല്‍ എഫ്‌ഐആർ ഇടുമോ എന്നും പ്രാഥമിക പരിശോധന നടത്തണോ വേണ്ടയോ എന്ന് തീരുമാനിക്കുന്നത് അന്വേഷണ ഉദ്യോഗസ്ഥൻ ആണെന്നും പറഞ്ഞു.
