കൊല്ലം: സിനിമയില്‍ അഭിനയിക്കാൻ അവസരം വാഗ്ദാനം ചെയ്ത് പ്ലസ് വണ്‍ വിദ്യാർഥിനിയെ പീഡിപ്പിച്ചെന്ന പരാതിയില്‍ 75കാരനെതിരെ പോക്സോ നിയമപ്രകാരം പൊലീസ് കേസെടുത്തു.
കൊല്ലം രണ്ടാംകുറ്റി സ്വദേശി നാസിമിനെതിരെയാണ് കേസ് രജിസ്റ്റർ ചെയ്തത്.
മൂന്ന് പേർ ചേർന്ന് നിർമിക്കുന്ന സിനിമയില്‍ താൻ നിർമാതാവാണെന്നും പെണ്‍കുട്ടിയെ സിനിമയില്‍ അഭിനയിപ്പിക്കാമെന്നും ഇയാള്‍ വാഗ്ദാനം ചെയ്തിരുന്നതായാണ് പരാതി. ഇതിന്റെ പേരില്‍ പെണ്‍കുട്ടിയില്‍ നിന്ന് 10,000 രൂപ വാങ്ങിയതായും പരാതിയില്‍ പറയുന്നു.
എന്നാല്‍ സിനിമയുടെ കാര്യങ്ങള്‍ മുന്നോട്ടുപോകാതെ വന്നതോടെ പെണ്‍കുട്ടി പണം തിരികെ ആവശ്യപ്പെട്ടു. തുടർന്ന് രണ്ടാംകുറ്റി ജംക്‌ഷനില്‍ എത്തിയാല്‍ പണം നല്‍കാമെന്ന് പറഞ്ഞ് ഇയാള്‍ പെണ്‍കുട്ടിയെ വിളിച്ചുവരുത്തിയെന്നാണ് മൊഴി.
കാറിലെത്തിയ നാസിം, പണം വീട്ടിലാണെന്ന് പറഞ്ഞ് പെണ്‍കുട്ടിയെ വീട്ടിലേക്ക് കൂട്ടിക്കൊണ്ടുപോയി ഉപദ്രവിച്ചുവെന്നാണ് ആരോപണം. ഇതിനിടെ പെണ്‍കുട്ടി സുഹൃത്തിന്റെ സഹായം തേടിയതായും മൊബൈല്‍ ഫോണിലൂടെ ലൊക്കേഷൻ അയച്ചുനല്‍കിയതിനെ തുടർന്ന് സുഹൃത്ത് സ്ഥലത്തെത്തി രക്ഷപ്പെടുത്തിയതായും വനിതാ പൊലീസ് സ്റ്റേഷനില്‍ നല്‍കിയ മൊഴിയില്‍ പറയുന്നു.
സംഭവത്തില്‍ കേസെടുത്ത പൊലീസ് വിശദമായ അന്വേഷണം ആരംഭിച്ചു. പരാതിയില്‍ ഉന്നയിച്ച ആരോപണങ്ങളില്‍ അന്വേഷണം തുടരുകയാണ്.
