തിരുവനന്തപുരം: കണ്ണൂർ ജില്ലാ പഞ്ചായത്ത് മുൻ പ്രസിഡന്റും സിപിഎം നേതാവുമായ പി പി ദിവ്യയെ ബിജെപിയിലേക്ക് സ്വീകരിക്കില്ലെന്ന് പാർട്ടി ദേശീയ സെക്രട്ടറി കെ സുരേന്ദ്രൻ.
ഇത്തരം ആളുകള്‍ക്ക് വരാനുള്ള വഴിയമ്പലമല്ല ബിജെപിയെന്ന് അദ്ദേഹം വ്യക്തമാക്കി. ദിവ്യയെ പാർട്ടിയിലേയ്ക്ക് സ്വാഗതം ചെയ്ത ബിജെപി മുതിർന്ന നേതാവ് പി കെ കൃഷ്ണദാസിന്റെ നിലപാടിനെ സുരേന്ദ്രൻ പൂർണമായും തള്ളി.
എഡിഎം നവീൻ ബാബുവിന്റെ മരണവുമായി ബന്ധപ്പെട്ട കേസില്‍ പ്രതിയായ പി പി ദിവ്യയെ പാർട്ടിയിലേക്ക് സ്വാഗതം ചെയ്യുന്നു എന്ന രീതിയില്‍ പി കെ കൃഷ്ണദാസ് നടത്തിയ പ്രസ്താവന വലിയ രാഷ്ട്രീയ ചർച്ചകള്‍ക്ക് വഴിവച്ചിരുന്നു. ഇതിന് പിന്നാലെയാണ് പാർട്ടി നിലപാട് വ്യക്തമാക്കി ബിജെപി ദേശീയ സെക്രട്ടറി നേരിട്ട് രംഗത്തെത്തിയത്.
കൃഷ്ണദാസ് അങ്ങനെ പറയില്ല. പി പി ദിവ്യ ആരാണ്? അവർ അഴിമതിക്കാരിയാണ്. ഇത്തരക്കാർക്ക് വരാൻ ഇത് വഴിയമ്പലമല്ല. അവരെ ബിജെപിയില്‍ എടുക്കില്ല.'- അദ്ദേഹം വ്യക്തമാക്കി. എഡിഎം നവീൻ ബാബു മരണപ്പെട്ട കേസില്‍ അദ്ദേഹത്തിന്റെ കുടുംബത്തിന് നീതി ലഭിക്കുന്നതിനായി ഏറ്റവുമധികം പരിശ്രമിച്ചതും പോരാടിയതും ബിജെപിയാണെന്നും അതിനാല്‍ ദിവ്യയെപ്പോലൊരളെ പർട്ടിയില്‍ എടുക്കുന്നതിനെക്കുറിച്ച്‌ ചിന്തിക്കാൻപോലും കഴിയില്ലെന്നും കെ സുരേന്ദ്രൻ കൂട്ടിച്ചേർത്തു.
അതേസമയം, ഇക്കഴിഞ്ഞ നിയമസഭാ തിരഞ്ഞെടുപ്പില്‍ പാർട്ടി ഫണ്ടില്‍ ക്രമക്കേട് കണ്ടെത്തിയെന്നും കെ സുരേന്ദ്രൻ വെളിപ്പെടുത്തി. കൃത്യമായ ഓഡിറ്റ് നടക്കുന്നതുകൊണ്ടാണ് ഇത് കണ്ടെത്തുന്നതും നടപടി എടുക്കുന്നതും. ഇപ്പോള്‍ ചില ആള്‍ക്കാർക്കെതിരെ നടപടിയെടുത്തു. മറ്റു പാർട്ടികളില്‍ ഓഡിറ്റ് നടക്കുന്നില്ലെന്നും അദ്ദേഹം വ്യക്തമാക്കി.
