വായു മലിനീകരണം, അന്തരീക്ഷത്തിലെ പൊടിപടലങ്ങള്, കാലാവസ്ഥാ വ്യതിയാനം തുടങ്ങിയ പ്രശ്നങ്ങളാണ് ശ്വസനാരോഗ്യ പ്രശ്നങ്ങള് കൂടാൻ കാരണമാകുന്നത്.
എന്നാല് പുറത്തുപോകുമ്പോള് എടുക്കുന്ന അത്രയും മുൻകരുതലുകള് നമ്മള് വീടുകളില് എടുക്കാറില്ല. ഇത് ആസ്ത്മ പോലുള്ള രോഗങ്ങള് ഉള്ളവർക്ക് കൂടുതല് ബുദ്ധിമുട്ടുകള് ഉണ്ടാക്കുന്നു. രാത്രിയിലോ അതിരാവിലെയോ, അല്ലെങ്കില് കൂടുതല് സമയം വീടിനുള്ളില് ചെലവഴിക്കുമ്പോഴോ ചുമ, ശ്വാസംമുട്ടല് എന്നിവ കൂടുന്നതായി ശ്രദ്ധയില്പ്പെട്ടിട്ടുണ്ടെങ്കില് അതിന് കാരണം വീടിനുള്ളില് ഒളിച്ചിരിക്കുന്ന അലർജി പരത്തുന്ന കാര്യങ്ങളാവാം. ഇക്കാര്യങ്ങള് ശ്രദ്ധിക്കാം.
1. കിടപ്പുമുറിയിലെ പൊടിപടലങ്ങള്
തലയിണകള്, കിടക്ക, കർട്ടനുകള്, കാർപെറ്റുകള്, സോഫ, കുട്ടികളുടെ പാവകള് എന്നിവയില് കാലക്രമേണ പൊടി അടിഞ്ഞുകൂടുന്നു. ഇതില് കാണപ്പെടുന്ന പൊടിപടലങ്ങള് കടുത്ത അലർജിക്കും ആസ്ത്മയ്ക്കും കാരണമാകുന്നു. രാവിലെ എഴുന്നേല്ക്കുമ്പോഴുള്ള തുമ്മല്, മൂക്കടപ്പ്, രാത്രിയിലെ ചുമ എന്നിവ ഇതിന്റെ ലക്ഷണങ്ങളാണ്.
2. ഈർപ്പമുള്ള ചുവരുകളും പൂപ്പലും
മഴക്കാലത്തോ സൂര്യപ്രകാശം കുറവുള്ളപ്പോഴോ വീടുകളില് ഈ പ്രശ്നം കൂടാം. ഫർണിച്ചറുകളുടെ പിൻഭാഗം, ബാത്റൂമിന് സമീപം, സീലിംഗ്, എയർകണ്ടീഷണറുകള്ക്ക് അരികില് എന്നിവടങ്ങളില് ഉണ്ടാകുന്ന ഈർപ്പം പൂപ്പലും ദുർഗന്ധവും ഉണ്ടാവാൻ കാരണമാകുന്നു. ഇത് ശ്വാസനാളത്തെ അസ്വസ്ഥമാക്കുന്നു.
3. സുഗന്ധദ്രവ്യങ്ങളും പുകയും
അഗർബത്തികള്, റൂം സ്പ്രേകള്, സുഗന്ധമുള്ള മെഴുകുതിരികള്, കൊതുക് തിരികള്, കർപ്പൂരം, വീര്യം കൂടിയ ക്ലീനിംഗ് ദ്രാവകങ്ങള് എന്നിവയും ആസ്ത്മ കൂട്ടുന്ന ഘടകങ്ങളാണ്. അടച്ചിട്ട മുറികളില് ഇവയുടെ മണം കേന്ദ്രീകരിക്കുമ്പോള് അത് ശ്വാസനാളത്തെ ദീർഘനേരം അസ്വസ്ഥമാക്കും.
4. വളർത്തുമൃഗങ്ങള്
വളർത്തുമൃഗങ്ങള് പലപ്പോഴും ശ്രദ്ധിക്കപ്പെടാതെ പോകുന്ന ഒരു ഘടകമാണിത്. വീട്ടിലെ അംഗങ്ങളുമായി മൃഗങ്ങള് അടുത്തിടപഴകുന്നതിനാല് തുടക്കത്തില് ഇത് തിരിച്ചറിയാൻ കഴിഞ്ഞെന്ന് വരില്ല. മൃഗങ്ങളുടെ ഉമിനീര്, രോമം, തൊലിയിലെ കോശങ്ങള് എന്നിവയിലെ പ്രോട്ടീനുകള് ചിലരില് ആസ്ത്മയ്ക്ക് കാരണമാകാറുണ്ട്.
5. എയർകണ്ടീഷണറുകള്
എസി മുറികളില് സമയം ചെലവഴിക്കുന്നതും ചിലപ്പോള് വിനയാകാം. എയർകണ്ടീഷണറുകളുടെ ഫില്ട്ടറുകള് കൃത്യമായി വൃത്തിയാക്കിയില്ലെങ്കില്, അതിലടിയുന്ന പൊടിയും മറ്റ് അലർജി ഘടകങ്ങളും മുറിക്കുള്ളിലെ വായുവില് പടരും. ഇത് ആസ്ത്മ രോഗികളുടെ അവസ്ഥ കൂടുതല് വഷളാക്കുന്നു.
6. ശ്രദ്ധിക്കേണ്ടത്
വീടിനുള്ളിലെ ഇത്തരം പ്രശ്നങ്ങളെ തിരിച്ചറിഞ്ഞ് പരിഹരിക്കുക എന്നതാണ് ആസ്ത്മ വീണ്ടും വരാതിരിക്കാൻ ചെയ്യേണ്ടത്. വീടുകളില് നല്ല വായുസഞ്ചാരം ഉറപ്പാക്കുക, പൊടി അടിഞ്ഞുകൂടുന്നത് ഒഴിവാക്കുക, എസി ഫില്ട്ടറുകള് കൃത്യമായി വൃത്തിയാക്കുക, ചുവരുകളിലെ ഈർപ്പം ഇല്ലാതാക്കുക, വീര്യം കൂടിയ സുഗന്ധങ്ങള് മുറിക്കുള്ളില് ഒഴിവാക്കുക എന്നിവയിലൂടെ ആസ്ത്മയെ ഒരു പരിധി വരെ നിയന്ത്രിക്കാൻ സാധിക്കും.
