കൊച്ചി: ഫോർട്ട്കൊച്ചി അമരാവതിയില് അനധികൃതമായി മദ്യം സൂക്ഷിച്ച് ഡ്രൈ ഡേകളില് അമിതവിലയ്ക്ക് വില്പ്പന നടത്തിവന്നയാളെ പോലീസ് അറസ്റ്റ് ചെയ്തു.
അമരാവതി അയോദ്ധ്യപറമ്പ് സ്വദേശി മണികണ്ഠൻ (48) ആണ് ഫോർട്ട് കൊച്ചി പോലീസിന്റെ പിടിയിലായത്. ഇയാളുടെ വീട്ടില് നടത്തിയ പരിശോധനയില് 500 മില്ലിലിറ്ററിന്റെ 18 കുപ്പികളിലായി സൂക്ഷിച്ചിരുന്ന 9 ലിറ്ററോളം അനധികൃത മദ്യം പോലീസ് പിടിച്ചെടുത്തു.
കൊച്ചി സിറ്റി പോലീസ് കമ്മീഷണർ കാളിരാജ് മഹേഷ് കുമാറിന്റെ നിർദ്ദേശാനുസരണം മട്ടാഞ്ചേരി അസിസ്റ്റന്റ് കമ്മീഷണർ അജിത് കുമാർ, ഫോർട്ട് കൊച്ചി സിഐ വിപിൻ ദാസ് എന്നിവരുടെ നേതൃത്വത്തിലാണ് പരിശോധന നടന്നത്. ഫോർട്ട്കൊച്ചി പോലീസ് സ്റ്റേഷൻ എസ്എച്ച്ഒ എസ്ഐ അജ്മല് ഹുസൈൻ, എസ്ഐ സന്തോഷ് കുമാർ, എഎസ്ഐമാരായ ശ്രീകുമാർ, നിഷ, സീനിയർ സിപിഒമാരായ അനീഷ് ടി.ആർ., വിപിൻ വി., അനീഷ് കെ.ടി., സിപിഒമാരായ ഉമേഷ് ഉദയൻ, പ്രജീഷ്, അജിത്, അബുതാലിബ് എന്നിവരടങ്ങിയ സംഘമാണ് പ്രതിയുടെ വീട്ടില് നിന്ന് മദ്യശേഖരം കണ്ടെത്തി അറസ്റ്റ് രേഖപ്പെടുത്തിയത്. ചീഫ് ജുഡീഷ്യല് മജിസ്ട്രേറ്റ് കോടതിയില് ഹാജരാക്കിയ പ്രതിയെ കോടതി റിമാൻഡ് ചെയ്തു.
