പത്തനംതിട്ട: 16 വയസ്സുകാരൻ ലൈസൻസില്ലാതെ വാഹനങ്ങള്‍ ഓടിച്ച സംഭവത്തില്‍ രണ്ടുപേർക്കെതിരെ കേസെടുത്തു. അടൂർ പൊലീസ് ആണ് കേസെടുത്തത്.
അടുത്തടുത്ത് അപകടങ്ങള്‍ തുടർക്കഥയാകുമ്പോഴും പത്തനംതിട്ടയില്‍ 16കാരന്റെ കൂട്ടുകാരുമൊത്ത് കറക്കം സ്വന്തം കാറോടിച്ച്‌ എന്ന് മാത്രമല്ല
ഒപ്പം റീല്‍സെടുക്കലും സാമൂഹികമാധ്യമങ്ങളില്‍ പങ്കുവെക്കുകയും ചെയ്യും. സംഭവം പോലീസിന്റെ ശ്രദ്ധയില്‍പ്പെട്ടതോടെ വാഹനമുള്‍പ്പെടെ പൊക്കി. ലൈസൻസില്ലാതെ ബൈക്കും, കാറും ഓടിച്ചതിന് പ്രായപൂർത്തിയാകാത്ത വിദ്യാർഥിയുടെ രക്ഷകർത്താവിനെതിരെ പോലീസ് കേസുമെടുത്തു ഏഴംകുളം നെടുമണ്‍ പാലമൂട്ടില്‍ റജീന നൗഷാദി(52)നെതിരെയാണ് പോലീസ് കേസെടുത്തത്.
ഇവരുടെ പേരിലുള്ള കാറും, കൊല്ലം പാതിരിക്കല്‍ രതീഷ് ഭവനില്‍ രവീന്ദ്രൻ (65) എന്നയാളുടെ പേരിലുള്ള ബൈക്കും അടൂർ ട്രാഫിക് പോലീസ് കസ്റ്റഡിയില്‍ എടുത്തു. ഇയാളുടെ പേരിലും പോലീസ് കേസെടുത്തിട്ടുണ്ട്. എന്നാല്‍ ഈ ബൈക്ക് രവീന്ദ്രൻ കുറച്ചു നാളുകള്‍ക്ക് മുൻപ് വിറ്റതാണെന്ന് പോലീസിനോട് പറഞ്ഞു.
അതേസമയം റജീനയുടെ പ്രായപൂർത്തിയാകാത്ത മകൻ കുറച്ചു നാളുകളായി കാറില്‍ അടൂർ, കൊടുമണ്‍ പ്രദേശങ്ങളില്‍ കറങ്ങുന്നതായി ട്രാഫിക് എസ്.ഐ. ജി. സുരേഷ് കുമാറിന് വിവരം ലഭിച്ചിരുന്നു. അടൂർ നഗരത്തില്‍ തിരക്കുള്ള പല സമയങ്ങളിലും കുട്ടി കാറുമായി എത്താറുണ്ടായിരുന്നു. ഇതു കൂടാതെ കാർ ഓടിക്കുന്ന രംഗങ്ങള്‍ വീഡിയോയായി പകർത്തി സാമൂഹിക മാധ്യമങ്ങളില്‍ റീല്‍സ് ഇടുകയും ചെയ്തു.
ഇതോടെ പോലീസ് രണ്ടു ദിവസങ്ങളായി അടൂരിലും പരിസരങ്ങളിലും പരിശോധന ശക്തമാക്കിയിരുന്നു. ചൊവ്വാഴ്ച വൈകീട്ട് ഒന്നിന് പറക്കോട്-ഏഴംകുളം ഭാഗത്തുവെച്ച്‌ പോലീസ് തിരയുന്ന കാർ ശ്രദ്ധയില്‍പ്പെട്ടു. ഇതോടെ കാർ തടഞ്ഞു നിർത്തി. എന്നാല്‍ ഈ സമയം സ്ഥിരമായി കാർ ഓടിക്കുന്ന പ്രായപൂർത്തിയാകാത്ത കുട്ടിയല്ലായിരുന്നു കാർ ഓടിച്ചത്. പക്ഷെ കുട്ടിയുടെ കുറച്ച്‌ സുഹൃത്തുക്കള്‍ കാറിലുണ്ടായിരുന്നു. നെടുമണ്‍ സ്വദേശി ബേസില്‍ എന്ന 18-കാരനാണ് ഈ സമയം കാറോടിച്ചിരുന്നത്. എന്നാല്‍ ഇയാള്‍ക്ക് കാർ ഓടിക്കാനുള്ള ലൈസൻസ് ഉണ്ടായിരുന്നില്ല. കാറിന് തൊട്ടുപിന്നാലെ തന്നെ പോലീസ് തിരഞ്ഞിരുന്ന പ്രായപൂർത്തിയാകാത്ത കുട്ടി ബൈക്കില്‍ സ്ഥലത്തെത്തി. ഇതോടെ കാർ ഓടിച്ചയാളേയും പ്രായപൂർത്തിയാകാത്ത ആളേയും പോലീസ് കസ്റ്റഡിയില്‍ എടുക്കുകയായിരുന്നു. പ്രായപൂർത്തിയാകാത്ത കുട്ടി കുറച്ചു നാളുകളായി പല വാഹനങ്ങള്‍ ഓടിക്കുന്നതായി പോലീസിന് വിവരം ലഭിച്ചിരുന്നു. ഈ വാഹനങ്ങള്‍ എല്ലാം കണ്ടെത്താനുള്ള ശ്രമത്തിലാണ് പോലീസ്. 16-കാരനെ രക്ഷിതാക്കള്‍ക്കൊപ്പം വിട്ടയച്ചു.
