തിരുവനന്തപുരം: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധത്തില്‍ പങ്കെടുത്ത ശേഷം തിരുവനന്തപുരത്ത് മടങ്ങിയെത്തിയ പ്രതിപക്ഷ നേതാവ് പിണറായി വിജയന് സി പി എം പ്രവർത്തകരുടെ വമ്പൻ വരവേല്‍പ്പ്.
തിരുവനന്തപുരം വിമാനത്താവളത്തില്‍ വന്നിറങ്ങിയ പിണറായിയെ ആവോശത്തോടെയാണ് പ്രവർത്തകർ വരവേറ്റത്.
പിണറായി അടക്കമുള്ള നേതാക്കളെ സ്വീകരിക്കാൻ വലിയ തിരക്കും ആവേശവുമാണ് വിമാനത്താവളത്തിന്പുറത്ത് അനുഭവപ്പെട്ടത്.
'കണ്ണേ കരളേ പിണറായി' എന്ന മുദ്രാവാക്യം വിളിച്ചാണ് പ്രവർത്തകർ സ്വീകരിച്ചത്. പിണറായിക്കൊപ്പം സംസ്ഥാന സെക്രട്ടറി എം വി ഗോവിന്ദനടക്കമുള്ള നേതാക്കളും ഉണ്ടായിരുന്നു.
ഗ്യാനേഷിനെതിരായ പ്രതിഷേധത്തില്‍ പങ്കെടുക്കാനെത്തിയ പിണറായിയെ ഇന്നലെ രാവിലെ പത്തരയോടെയാണ് ഡൽഹി പൊലീസ് കസ്റ്റഡിയിലെടുത്തത്. എട്ട് മണിക്കൂറിന് ശേഷം രാത്രി ഏഴ് മണിയോടെയാണ് പിണറായിയെ വിട്ടയച്ചത്.
പത്തരക്ക് കസ്റ്റഡിയില്‍ എടുത്ത പിണറായിയെ മൂന്നര മണിക്കൂറോളം വാഹനത്തില്‍ വട്ടംകറക്കിയ ശേഷമാണ് ഡൽഹി പൊലീസ് മന്ദിർ മാർഗ് പൊലീസ് സ്റ്റേഷനില്‍ എത്തിച്ചത്.
ഭക്ഷണവും മരുന്നുമടക്കം മുടങ്ങിയതോടെ പിണറായിക്ക് ശാരീരിക അസ്വസ്ഥത അനുഭവപ്പെട്ടെന്ന് ഒപ്പമുണ്ടായിരുന്ന നേതാക്കള്‍ വ്യക്തമാക്കിയിരുന്നു. പ്രായമായ ഒരു നേതാവിനോട് തികച്ചും മോശമായാണ് ഡൽഹി പൊലീസ് പെരുമാറിയതെന്നും നേതാക്കള്‍ ചൂണ്ടിക്കാട്ടിയിരുന്നു. ഇതോടെയാണ് നാട്ടില്‍ മടങ്ങിയെത്തിയ പിണറായിക്ക് സി പി എം പ്രവർത്തകർ വലിയ സ്വീകരണം ഒരുക്കിയത്.
