ഡല്‍ഹി: മുത്തശ്ശിയുടെ മരണവിവരമറിഞ്ഞതിന് പിന്നാലെ തന്നെ അഭിജീത് ദീപ്കെയ്ക്ക് സഹായങ്ങളെല്ലാം വാഗ്ദാനം ചെയ്തിരുന്നതായി ഡല്‍ഹി പൊലീസ്.
അഭിജീത് ദീപ്കെ പൊലീസ് കസ്റ്റഡിയിലിരിക്കെയാണ് അദ്ദേഹത്തിന്റെ മുത്തശ്ശി അന്തരിച്ചത്. മരണവിവരം അറിയിച്ചിട്ടും പൊലീസ് ദീപ്കെയെ വിട്ടയക്കാൻ വൈകിയെന്നും സംസ്കാരചടങ്ങുകളില്‍ പങ്കെടുക്കാതിരിക്കാനാണ് പൊലീസ് ഇങ്ങനെ ചെയ്തതെന്നുമായിരുന്നു ദീപ്കെയുടെ കുടുംബത്തിന്റെ ആരോപണം. എന്നാല്‍, ഈ ആരോപണങ്ങള്‍ തെറ്റാണെന്നായിരുന്നു ഡല്‍ഹി പൊലീസ് പിആർഒയായ ഡിസിപി നേഹ യാദവിന്റെ വിശദീകരണം. ദീപ്കെ പൊലീസ് കസ്റ്റഡിയിലിരിക്കെയുള്ള വീഡിയോദൃശ്യങ്ങള്‍ സഹിതമാണ് ഡിസിപി വാർത്താസമ്മേളനം നടത്തിയത്. അതേസമയം, ഡല്‍ഹി പൊലീസിന്റെ വാദങ്ങള്‍ അഭിജീത് ദീപ്കെ തള്ളി. പലതവണ അഭ്യർഥിച്ചിട്ടും പൊലീസുകാർ ഫോണ്‍ ഉപയോഗിക്കാൻ അനുവദിച്ചില്ലെന്നും അഭിഭാഷകനുമായി ബന്ധപ്പെടാൻ പോലും അനുമതി നല്‍കിയില്ലെന്നും ദീപ്കെ നാഗ്പുരില്‍ മാധ്യമങ്ങളോട് പ്രതികരിച്ചു.
മുത്തശ്ശിയുടെ മരണവിവരവും സംസ്കാരത്തിന്റെ സമയവുമെല്ലാം ദീപ്കെയെ കൃത്യസമയത്ത് തന്നെ അറിയിച്ചിരുന്നതായാണ് ഡിസിപി വാർത്താസമ്മേളനത്തില്‍ പറഞ്ഞത്. ഇതിനുപുറമേ വീട്ടിലേക്ക് പോകാനുള്ള യാത്രാസൗകര്യവും വാഗ്ദാനം ചെയ്തു. എവിടെ വേണമെങ്കിലും യാത്രചെയ്യാമെന്നും ബസോ വിമാനമോ അല്ലെങ്കില്‍ മറ്റുസൗകര്യങ്ങളോ ഒരുക്കാമെന്നും ഒരു പൊലീസ് ഉദ്യോഗസ്ഥൻ ദീപ്കെയോട് പറയുന്നതാണ് പൊലീസ് പുറത്തുവിട്ട ദൃശ്യങ്ങളിലുള്ളത്. തന്റെ ഔദ്യോഗിക ഫോണില്‍നിന്ന് കുടുംബത്തെ വിളിക്കാമെന്നും പൊലീസ് ഉദ്യോഗസ്ഥൻ പറഞ്ഞു. എന്നാല്‍, ഇപ്പോള്‍ തന്റെ പിതാവിനോട് സംസാരിക്കാനാകില്ലെന്നായിരുന്നു ദീപ്കെ പൊലീസുകാരനോട് പറഞ്ഞത്. തുടർന്ന് നമുക്ക് എന്ത് ചെയ്യാൻ പറ്റുമെന്ന് നോക്കാമെന്ന് ഉദ്യോഗസ്ഥൻ പറയുന്നതും പൊലീസ് പുറത്തുവിട്ട ദൃശ്യങ്ങളിലുണ്ട്.
