പാലക്കാട്: സിപിഎം പാലക്കാട് മുൻ ജില്ലാ സെക്രട്ടറി ഇ എൻ സുരേഷ് ബാബുവിനെതിരെ ഗുരുതരമായ സാമ്പത്തിക ക്രമക്കേടുകളും അനധികൃത സ്വത്ത് സമ്പാദനവും ആരോപിച്ച്‌ വിജിലൻസില്‍ പരാതി.
സിഎംപിയുടെ സംസ്ഥാന യുവ നേതാവ് വി മുസ്തഫയാണ് വിജിലൻസ് ആൻഡ് ആന്‍റി കറപ്ഷൻ ബ്യൂറോ ഡയറക്ടർക്ക് പരാതി നല്‍കിയിരിക്കുന്നത്. അനധികൃത സ്വത്ത് സമ്പാദനം, സാമ്പത്തിക ഇടപാടുകള്‍, കള്ളപ്പണം വെളുപ്പിക്കല്‍, ബിനാമി നിക്ഷേപങ്ങള്‍ എന്നിവ സമഗ്രമായി അന്വേഷിക്കണമെന്നാണ് പരാതിയിലെ ആവശ്യം.
പാലക്കാട്ടെ മൂന്ന് സഹകരണ സ്ഥാപനങ്ങള്‍ കേന്ദ്രീകരിച്ച്‌ വലിയ തോതില്‍ സാമ്പത്തിക ക്രമക്കേടുകള്‍ നടന്നിട്ടുണ്ടെന്ന് പരാതിയില്‍ ആരോപിക്കുന്നു. ചിറ്റൂർ താലൂക്ക് ടൂറിസം കോ-ഓപ്പറേറ്റീവ് സൊസൈറ്റി ആൻഡ് റിസർച്ച്‌ സെന്‍റർ, പാലക്കാട് ജില്ലാ എൻജിനീയറിങ് സഹകരണ സംഘം, ചിറ്റൂർ താലൂക്ക് പ്രവാസി ക്ഷേമ സഹകരണ സംഘം എന്നിവയുടെ ഇടപാടുകളാണ് അന്വേഷണ പരിധിയില്‍ ഉള്‍പ്പെടുത്താൻ ആവശ്യപ്പെട്ടിട്ടുള്ളത്. ഈ സഹകരണ സ്ഥാപനങ്ങള്‍ വഴി ബിനാമി നിക്ഷേപങ്ങളും കണക്കില്‍പ്പെടാത്ത പണത്തിന്‍റെ ഇടപാടുകളും നടന്നിട്ടുണ്ടോയെന്ന് പരിശോധിക്കണം.
കൂടാതെ വായ്പാ വിതരണത്തിലെ ക്രമക്കേടുകള്‍, സ്വത്ത് മൂല്യനിർണയത്തിലെ കൃത്രിമം, സ്ഥാപനങ്ങളുടെ ഫണ്ട് വഴിതിരിച്ചുവിടല്‍ എന്നിവയും അന്വേഷിക്കണമെന്ന് ആവശ്യപ്പെട്ടിട്ടുണ്ട്.
സുരേഷ് ബാബുവിന്‍റെയും കുടുംബാംഗങ്ങളുടെയും അടുത്ത ബന്ധുക്കളുടെയും പേരിലുള്ള നിക്ഷേപങ്ങള്‍, ലോക്കറുകള്‍, സ്ഥാവര സ്വത്തുക്കള്‍ എന്നിവയെക്കുറിച്ച്‌ പരിശോധന നടത്തണം.
വരുമാനത്തിന് ആനുപാതികമല്ലാത്ത സ്വത്ത് സമ്പാദനത്തില്‍ വിജിലൻസ് ഡയറക്ടർ പ്രാഥമിക അന്വേഷണം നടത്തണമെന്നാണ് ആവശ്യം. അന്വേഷണത്തില്‍ സാമ്പത്തിക ക്രമക്കേടുകള്‍ സ്ഥിരീകരിച്ചാല്‍ കേസ് എൻഫോഴ്‌സ്‌മെന്‍റ് ഡയറക്ടറേറ്റിനും ആദായനികുതി വകുപ്പിന്‍റെ ബിനാമി നിരോധന വിഭാഗത്തിനും കൈമാറണമെന്നും പരാതിയില്‍ പറയുന്നു.
അതേസമയം, സിപിഎമ്മിന്‍റെ പാലക്കാട്ടെ വിപുലീകൃത ജില്ലാ കമ്മിറ്റിയില്‍ സുരേഷ് ബാബുവിനെ സെക്രട്ടറി സ്ഥാനത്തുനിന്ന് മാറ്റിയിരുന്നു. ഇതിന് പിന്നാലെ അദ്ദേഹത്തിനെതിരെ പാർട്ടിയില്‍ ലൈംഗികാതിക്രമ പരാടിയും ഉയർന്നിട്ടുണ്ട്.
