പാലക്കാട്: മുന്‍ സി.പി.എം പാലക്കാട് ജില്ലാ സെക്രട്ടറി ഇ.എന്‍. സുരേഷ് ബാബുവിനെതിരായ ആരോപണ വിവാദത്തില്‍ ഡി.ജി.പിക്ക് ലഭിച്ച പരാതി പാലക്കാട് ജില്ലാ പോലീസ് മേധാവിക്ക് അന്വേഷണത്തിനായി കൈമാറിയതോടെ വിഷയം പുതിയൊരു നിയമ-രാഷ്ട്രീയ തര്‍ക്കത്തിലേക്ക് നീങ്ങുകയാണ്.
കെ.പി.സി.സി സെക്രട്ടറി ജോണ്‍ ഡാനിയല്‍ സമര്‍പ്പിച്ച പരാതിയിലാണ് തുടരന്വേഷണത്തിനും നിയമനടപടികള്‍ക്കുമായി പാലക്കാട് പൊലീസിന് നിര്‍ദ്ദേശം നല്‍കിയിരിക്കുന്നത്. പരാതി കൈമാറിയ വിവരം ഡി.ജി.പിയുടെ ഓഫീസില്‍ നിന്ന് ഔദ്യോഗികമായി പരാതിക്കാരനെ അറിയിക്കുകയും ചെയ്തിട്ടുണ്ട്.
എന്നാല്‍, നിര്‍ണ്ണായകമായ ഒരു ക്രിമിനല്‍ കേസ് അന്വേഷണത്തില്‍ കേട്ടുകേള്‍വിയില്ലാത്ത തരത്തിലുള്ള വിചിത്രമായ പല ചോദ്യങ്ങളും നിയമക്കുരുക്കുകളുമാണ് ഈ കേസിനെ ചുറ്റിപ്പറ്റി ഉയര്‍ന്നുവരുന്നത്. ആരോപിക്കപ്പെടുന്ന കേസില്‍ ഇരയായ വ്യക്തിയെന്ന് പറയപ്പെടുന്ന യുവതി ഇതുവരെ പോലീസിലോ പൊതുമധ്യത്തിലോ യാതൊരുവിധ പരാതിയും നല്‍കിയിട്ടില്ല എന്നതുതന്നെയാണ് കേസിന്റെ ഏറ്റവും വലിയ അനിശ്ചിതത്വം.
കേരളത്തില്‍ കോണ്‍ഗ്രസ് ഭരണത്തിലുള്ളപ്പോഴും പോലീസിന് ഈ കേസില്‍ മുന്നോട്ടുപോകാന്‍ നിയമപരമായ വലിയ തടസ്സങ്ങളുണ്ട്. ഒരു മൂന്നാം കക്ഷി നല്‍കിയ രാഷ്ട്രീയ പരാതിയുടെ അടിസ്ഥാനത്തില്‍ അന്വേഷണം ആരംഭിക്കുമ്പോള്‍, പരാതിക്കാരി എന്ന് വിളിക്കപ്പെടേണ്ട വ്യക്തിയെന്ന് പറഞ്ഞ് പോലീസ് ആരുടെ മൊഴിയാണ് രേഖപ്പെടുത്തുക എന്നത് അന്വേഷണ സംഘത്തെ കുഴയ്ക്കുന്ന ചോദ്യമാണ്. നിയമപരമായി ഇരയുടെ സാക്ഷ്യമോ മൊഴിയോ ഇല്ലാതെ ഇത്തരമൊരു വിഷയത്തില്‍ പോലീസിന് കുറ്റപത്രം സമര്‍പ്പിക്കാന്‍ കഴിയില്ല.
പോലീസ് സംഘം യുവതിയെ കണ്ടെത്താന്‍ ശ്രമിക്കുകയും അവര്‍ തനിക്കെതിരെ യാതൊരുവിധ അതിക്രമവും നടന്നിട്ടില്ലെന്ന് വ്യക്തമാക്കുകയോ ആരോപണം പൂര്‍ണ്ണമായി നിഷേധിക്കുകയോ ചെയ്താല്‍ കേസ് അവിടെവെച്ച്‌ തന്നെ അവസാനിക്കും. പരാതിക്കാരി ആരോപണം നിഷേധിക്കുകയോ മൊഴി നല്‍കാന്‍ കൂട്ടാക്കാതിരിക്കുകയോ ചെയ്താല്‍ കേസിന്റെ അന്വേഷണം പ്രാരംഭ ഘട്ടത്തില്‍ തന്നെ അവസാനിപ്പിച്ച്‌ റിപ്പോര്‍ട്ട് നല്‍കേണ്ടി വരുമെന്ന് നിയമ വിദഗ്ദ്ധരും ചൂണ്ടിക്കാണിക്കുന്നു.
ഒരു വ്യക്തി തനിക്കെതിരെ അതിക്രമം നടന്നതായി മൊഴി നല്‍കാതിരിക്കുകയും, ആരോപണങ്ങള്‍ പൂര്‍ണ്ണമായി തള്ളിക്കളയുകയും ചെയ്താല്‍ മൂന്നാം കക്ഷികള്‍ നല്‍കുന്ന പരാതികള്‍ക്ക് കോടതിയില്‍ നിലനില്‍പ്പുണ്ടാകില്ല. അതുകൊണ്ടുതന്നെ, പരാതിക്കാരി രംഗത്തുവന്നില്ലെങ്കില്‍ പോലീസിന് കേസ് അവസാനിപ്പിക്കുകയല്ലാതെ മറ്റ് വഴികളില്ല.
സുരേഷ് ബാബുവിനെതിരെ കേസെടുത്ത് അന്വേഷിക്കണമെന്ന പ്രധാന ആവശ്യത്തോടൊപ്പം പ്രതിപക്ഷത്തെ പ്രമുഖരെ കുടുക്കാനും പരാതിക്കാരന്‍ ശ്രമിച്ചിട്ടുണ്ട്. വിഷയം മുന്‍കൂട്ടി അറിഞ്ഞിട്ടും പരാതി പോലീസിന് കൈമാറാതെ മറച്ചുവെച്ചെന്ന ആരോപണം ഉന്നയിച്ച്‌ പ്രതിപക്ഷ നേതാവ് പിണറായി വിജയന്‍, സി.പി.എം സംസ്ഥാന സെക്രട്ടറി എം.വി. ഗോവിന്ദന്‍ എന്നിവര്‍ക്കെതിരെയും നിയമനടപടി സ്വീകരിക്കണമെന്ന് പരാതിയില്‍ ആവശ്യപ്പെടുന്നുണ്ട്.
അതിനിടെ, ആരോപണങ്ങള്‍ ഉയര്‍ന്നതിന് പിന്നാലെ ജില്ലാ സെക്രട്ടറി സ്ഥാനത്തുനിന്ന് മാറ്റപ്പെട്ട ഇ.എന്‍. സുരേഷ് ബാബു വീണ്ടും പാര്‍ട്ടി വേദികളില്‍ സജീവമാകുന്നത് രാഷ്ട്രീയ ശ്രദ്ധ നേടുന്നുണ്ട്. കഴിഞ്ഞ ദിവസം ചേര്‍ന്ന സി.പി.എം ചിറ്റൂര്‍ ഏരിയ കമ്മിറ്റി യോഗത്തില്‍ സുരേഷ് ബാബു പങ്കെടുത്തു. പദവിയില്‍ നിന്ന് മാറ്റിയ ശേഷം ആദ്യമായാണ് അദ്ദേഹം ഒരു പാര്‍ട്ടി വേദിയില്‍ പരസ്യമായി എത്തുന്നത്.
നേരത്തെ, സുരേഷ് ബാബുവിനെ പാര്‍ട്ടിയുടെ പ്രാഥമിക അംഗത്വത്തില്‍ നിന്ന് തന്നെ മാറിനിര്‍ത്തിയേക്കുമെന്ന തരത്തില്‍ അഭ്യൂഹങ്ങള്‍ പ്രചരിച്ചിരുന്നു. എന്നാല്‍, കൃത്യമായ തെളിവുകളോ നിയമപരമായ പരാതികളോ ഇല്ലാതെ കേവലം പ്രചാരണങ്ങളുടെ പേരില്‍ മാത്രം കടുത്ത അച്ചടക്ക നടപടിയിലേക്ക് കടക്കേണ്ടതില്ലെന്ന നിലപാടിലാണ് സി.പി.എം നേതൃത്വം എത്തിച്ചേര്‍ന്നത്.
ഭരണപക്ഷമായ കോണ്‍ഗ്രസ് വിഷയം രാഷ്ട്രീയമായി ഉയര്‍ത്താന്‍ ശ്രമിക്കുന്നുണ്ടെങ്കിലും, നിയമപരമായി ഇരയാക്കപ്പെട്ട ആളുടെ പക്കല്‍ നിന്ന് ഉറപ്പുള്ള തെളിവുകളോ മൊഴിയോ ലഭിക്കാത്തത് തിരിച്ചടിയാകുന്നുണ്ട്. പരാതിക്കാരിയെന്ന് സംശയിക്കുന്ന വ്യക്തിയെ നിര്‍ബന്ധിച്ച്‌ മൊഴിയെടുപ്പിക്കാനോ സമ്മര്‍ദ്ദത്തിലാക്കാനോ പോലീസിന് നിയമപരമായി സാധിക്കുകയുമില്ല.
ജില്ലാ പോലീസ് മേധാവിക്ക് പരാതി ലഭിച്ച സാഹചര്യത്തില്‍ പ്രാരംഭ അന്വേഷണത്തിന്റെ ഭാഗമായി പ്രാഥമിക നീക്കങ്ങള്‍ നടത്തുമെങ്കിലും, പരാതിക്കാരിയുടെ നിലപാട് തന്നെയാണ് നിര്‍ണ്ണായകമാകുക. പരാതിക്കാരി മൊഴി നല്‍കാന്‍ വിസമ്മതിക്കുകയോ ആരോപണങ്ങള്‍ നിഷേധിക്കുകയോ ചെയ്താല്‍ കേസ് തള്ളേണ്ടിവരും; ഇത് സി.പി.എമ്മിന് വലിയ രാഷ്ട്രീയ ആശ്വാസമായി മാറുകയും ചെയ്യും.
