പാലാ: നഗരസഭാ വൈസ് ചെയര്പേഴ്സണ് തെരഞ്ഞെടുപ്പ് 16നു നടക്കും. ഇതുസംബന്ധിച്ച സംസ്ഥാന തെരഞ്ഞെടുപ്പ് കമ്മീഷന്റെ ഔദ്യോഗിക അറിയിപ്പ് ഇന്നലെ നഗരസഭയില് ലഭിച്ചു.
കോണ്ഗ്രസ് വിമതരും എല്ഡിഎഫ് കൗണ്സിലര്മാരും ചേര്ന്ന നഗരസവികസന മുന്നണിയില് തര്ക്കമില്ലാതെ ചെയര്പേഴ്സണ് തെരഞ്ഞെടുപ്പ് നടന്നെങ്കിലും വൈസ് ചെയര്പേഴ്സണ് തെരഞ്ഞെടുപ്പ് അത്ര സുഗമമല്ലെന്നാണ് നിലവിലെ സൂചനകള്.
നഗര വികസന മുന്നണി കൂട്ടായ്മയില്നിന്ന് വൈസ് ചെയര്പേഴ്സണ് സ്ഥാനത്തേക്ക് ബിജു മാത്യൂസും ടോണി തൈപ്പറമ്പിലും തമ്മിലുള്ള തര്ക്കം ഇപ്പോഴും തുടരുന്നു. സ്ഥാനാര്ഥിയെ ഏകകണ്ഠമായി തീരുമാനിക്കാന് അനൗപചാരിക ചര്ച്ചകള് പുരോഗമിക്കുകയാണ്
തര്ക്കം ഒഴിവാക്കി ഒത്തുതീര്പ്പ് സ്ഥാനാര്ഥിയെ കണ്ടെത്താനാണ് മുന്നണി നേതൃത്വം ശ്രമിക്കുന്നതെന്നാണ് സൂചന. ബിജു മാത്യൂസും ടോണി തൈപ്പറമ്പിനും ഒരേ നിലപാട് തുടര്ന്നാല് മറ്റൊരാളെ നഗരവികസന മുന്നണിയില്നിന്ന് കണ്ടെത്താനാണ് സാധ്യത.
പ്രത്യക്ഷമായി ഭരണപങ്കാളിത്തം ഒഴിവാക്കാന് കേരള കോണ്ഗ്രസ്-എം ആഗ്രഹിക്കുന്നതിനാൽതന്നെ തര്ക്കം മൂത്താല് വിമതര്ക്കിടയില്നിന്ന് രജിത പ്രകാശിന് സാധ്യത തെളിയും.
ബിജു മാത്യൂസും ടോണി തൈപ്പറമ്പനും വൈസ് ചെയര്പേഴ്സണ് സ്ഥാനത്തിന് അവകാശവാദം ഉന്നയിക്കുന്നുണ്ടെന്നും അവരുടെ തീരുമാനംവരെ തങ്ങള് കാക്കുകയാണെന്നും നഗര വികസന മുന്നണി ചെയര്മാന് ബിജു പാലൂപ്പടവന് പറഞ്ഞു.
അവര്ക്കൊരു സമവായത്തില് എത്താന് സാധിക്കുന്നില്ലെങ്കില് മുന്നണിയില് ചര്ച്ചകള് ആരംഭിക്കുമെന്നും പൊതുസമ്മതിയുള്ള ഒരു സ്ഥാനാര്ഥിയെ നിശ്ചയിക്കുമെന്നും പാലൂപ്പടവന് പറഞ്ഞു.
കേരള കോണ്ഗ്രസ്-എമ്മില്നിന്ന് ഒരു സ്ഥാനാര്ഥി വരാൻ നിലവില് സാധ്യതയില്ലെന്നും എന്നാല് അത്തരം കാര്യങ്ങള് ഇപ്പോള് ചര്ച്ചയിൽ ഇല്ലെങ്കിലും പിന്നീടുള്ള സാഹചര്യങ്ങളെ ആശ്രയിച്ചിരിക്കുമെന്നും അദ്ദേഹം പറഞ്ഞു.
