ചെന്നൈ: തമിഴ്നാട്ടിലെ നീലഗിരിയില്‍ കനത്ത മഴയും മണ്ണിടിച്ചിലും.
കൂനൂർ-മേട്ടുപ്പാളയം ചുരംറോഡില്‍ ബസിന് മുകളിലേക്ക് മണ്ണിടിഞ്ഞ് വീണ് ഡ്രൈവർ മരിച്ചു.
കണ്ടക്ടർ ഗുരുതര പരിക്കേറ്റു. മേട്ടുപ്പാളയം-ഊട്ടി റോഡില്‍ 14-ഓളം ഇടങ്ങളില്‍ മണ്ണിടിച്ചിലുണ്ടായെന്നാണ് റിപ്പോർട്ട്.
ശനിയാഴ്ച പുലർച്ചെയാണ് തമിഴ്നാട് സ്റ്റേറ്റ് ട്രാൻസ്പോർട്ട് കോർപ്പറേഷന്റെ ബസിന് മുകളിലേക്ക് മണ്ണിടിഞ്ഞുവീണത്. കൂനൂരില്‍ നിന്ന് മേട്ടുപ്പാളയത്തേക്ക് പോവുകയായിരുന്ന ബസില്‍ ഡ്രൈവറും കണ്ടക്ടറും മൂന്ന് യാത്രക്കാരുമാണ് ഉണ്ടായിരുന്നത്.
ഡ്രൈവറായ ജനഗരാജാണ് അപകടത്തില്‍ മരിച്ചത്. അവശിഷ്ടങ്ങള്‍ക്കിടയില്‍ കുടുങ്ങിയ ഇദ്ദേഹത്തെ കൂനൂരില്‍ നിന്നും മേട്ടുപ്പാളയത്തുനിന്നും എത്തിയ അഗ്നിരക്ഷാസേനയും പൊലീസും നാട്ടുകാരും ചേർന്നാണ് പുറത്തെടുത്തത്.
കണ്ടക്ടറായ കേശവനും അപകടത്തില്‍ ഗുരുതര പരിക്കുണ്ട്. ഇദ്ദേഹത്തെ ആശുപത്രിയില്‍ പ്രവേശിപ്പിച്ചു.
വെള്ളിയാഴ്ച രാത്രി മുതലാണ് നീലഗിരിയില്‍ മഴ ശക്തമായത്. തുടർന്ന് ഊട്ടി റോഡില്‍ പലയിടങ്ങളിലും മണ്ണിടിഞ്ഞ് ഗതാഗതം തടസപ്പെട്ടു.
ഊട്ടി-മേട്ടുപ്പാളയം ഹൈവേയിലും ഊട്ടി-കൂനൂർ ഹൈവേയിലും ഗതാഗതം പൂർണമായും തടസപ്പെട്ടു. പലയിടത്തും വാഹനങ്ങളുടെ നീണ്ടനിരയാണുള്ളത്.
അതിനിടെ, കോട്ടയം പാലായിലെ രണ്ട് സ്കൂളുകളില്‍നിന്നുള്ള വിനോദയാത്ര സംഘവും ചുരം റോഡില്‍ കുടുങ്ങി. പുലർച്ചെ വരെ വിദ്യാർഥികള്‍ക്കും അധ്യാപകർക്കും ബസില്‍ കഴിയേണ്ടിവന്നു.
തുടർന്ന് രാവിലെ ഇവർ കേരളം മുഖ്യമന്ത്രിയുടെ ഓഫീസിനെ ബന്ധപ്പെട്ടു. പിന്നാലെ തമിഴ്നാട്ടിലെ അധികൃതരെത്തി 150-ഓളം വിദ്യാർഥികളെ സമീപത്തെ സ്വകാര്യ സ്കൂളിലെ ക്യാമ്പിലേക്ക് മാറ്റി. ഇവർ സുരക്ഷിതരാണ്.
