ഭക്ഷണത്തിൽ എണ്ണ ധാരാളം ഉപയോഗിക്കുന്നവരാണ് നമ്മളിൽ പലരും.
അതേസമയം എണ്ണയുടെ ഉപയോഗം അമിതമാകുന്നത് പല ആരോഗ്യപ്രശ്നങ്ങളുമുണ്ടാക്കും.
ഒരിക്കൽ ഉപയോഗിച്ച എണ്ണ വീണ്ടും ഉപയോഗിക്കുന്ന ശീലമുള്ളവരുണ്ട്.
വറുക്കാനും മറ്റും ഉപയോഗിച്ച എണ്ണ ഒഴിവാക്കാൻ മടിച്ച് വീണ്ടും മറ്റു കറികൾ തയ്യാറാക്കാൻ ഉപയോഗിക്കുന്നവർ.
എന്നാൽ ഡീപ് ഫ്രൈ ചെയ്യാൻ ഉപയോഗിച്ച ഇത്തരത്തിലുള്ള എണ്ണ പുനരുപയോഗിക്കുന്നതിന്റെ ആരോഗ്യപ്രശ്നത്തേക്കുറിച്ചാണ് പുതിയൊരു പഠനത്തിൽ പങ്കുവെക്കുന്നത്.
ഇത് നാഡീസംബന്ധമായ തകരാറുകളും മസ്തിഷ്കക്ഷതവും ഉണ്ടാക്കുമെന്നാണ് പഠനത്തിൽ പറയുന്നത്.
വറുക്കാനും പൊരിക്കാനുമൊക്കെ ഉപയോഗിച്ച എണ്ണ വീണ്ടും ഉപയോഗിക്കുന്നത് കേന്ദ്രനാഡീവ്യവസ്ഥയുടെ പ്രവർത്തനം താറുമാറാക്കുമെന്നാണ് പഠനത്തിൽ പറയുന്നത്.
അമേരിക്കൻ സൊസൈറ്റി ഫോർ ബയോകെമിസ്ട്രി& മോളിക്യൂളാർ ബയോളജിയുടെ വാർഷിക സമ്മേളനത്തിൽ പഠനത്തിന്റെ സംക്ഷിക്തരൂപം അവതരിപ്പിച്ചിട്ടുണ്ട്.
ബയോളജിക്കൽ കെമിസ്ട്രി ജേർണലിലാണ് പഠനം പ്രസിദ്ധീകരിക്കുക. തമിഴ്നാട് സെൻട്രൽ യൂണിവേഴ്സിറ്റിയിലെ അസോസിയേറ്റ് പ്രൊഫസറായ ഡോ.കതിരേശൻ ഷൺമുഖത്തിന്റെ നേതൃത്വത്തിലാണ് പഠനം നടത്തിയത്.
ഫാസ്റ്റ് ഫുഡ് ഭക്ഷണങ്ങളിലും തെരുവോര ഭക്ഷണങ്ങളിലും പല വീട്ടകങ്ങളിലുമൊക്കെ ഡീപ് ഫ്രൈ ചെയ്യുന്ന രീതിയും അതേ എണ്ണതന്നെ പുനരുപയോഗിക്കുന്ന രീതിയും കാണാറുണ്ട്. ഇത്തരത്തിലുള്ള ഭക്ഷണരീതി പിന്തുടരുന്നത് ഹൃദയസംബന്ധമായ തകരാറുകൾക്കും ചിലയിനം കാൻസറുകൾക്കും കാരണമാകുമെന്ന് പലപഠനങ്ങളും തെളിയിച്ചിട്ടുണ്ട്. അത് സാധൂകരിക്കുന്നതാണ് പുതിയ പഠനവും.
പുനരുപയോഗിച്ച എണ്ണകൾ കൊണ്ടുള്ള ആഹാരക്രമം നൽകിയ എലികളെ ആധാരമാക്കിയാണ് പഠനം നടത്തിയത്. ഇവയിൽ സാധാരണ ഡയറ്റ് ശീലിച്ച എലികളെ അപേക്ഷിച്ച് ഇവയിൽ കേന്ദ്രനാഡീവ്യവസ്ഥയുടെ പ്രവർത്തനം തകരാറിലാകുന്നുവെന്ന് ഗവേഷകർ കണ്ടെത്തി.
പെൺ എലികളെ പല വിഭാഗങ്ങളായി തിരിച്ചാണ് പഠനം നടത്തിയത്. ഇതിൽ സാധാരണ ഡയറ്റ് കൊടുത്ത വിഭാഗം, ചൂടാക്കാത്ത സൺഫ്ലവർ ഓയിൽ ഉപയോഗിക്കുന്ന വിഭാഗം, വീണ്ടും ചൂടാക്കിയ
എള്ളെണ്ണ ഉപയോഗിച്ച വിഭാഗം, വീണ്ടുംചൂടാക്കിയ സൺഫ്ലവർ ഓയിൽ ഉപയോഗിച്ച വിഭാഗം എന്നിങ്ങനെയാണ് തിരിച്ചത്.
തുടർന്നാണ് വീണ്ടും ചൂടാക്കി ഉപയോഗിച്ച എണ്ണയുള്ള ഡയറ്റ് ശീലമാക്കിയവരിൽ കരളിലെ കോശങ്ങളിൽ വീക്കവും സമ്മർദവും കണ്ടെത്തിയത്.
മാത്രമല്ല മലാശയത്തിലും തകരാറുകൾ കണ്ടെത്തി. ഇത്തരം ഡയറ്റുകൾ കോളസ്ട്രോൾ, ട്രൈഗ്ലിസറൈഡുകൾ, എ.എസ്.ടി. ,എ.എൽ.ടി. തുടങ്ങിയവയുടെ നില വർധിപ്പിക്കുന്നുണ്ടെന്നും കരളിനും മലാശയത്തിനും പ്രശ്നങ്ങളുണ്ടാക്കുന്നുവെന്നും ഗവേഷകർ കണ്ടെത്തി.
പുനരുപയോഗിച്ച എണ്ണ ഡയറ്റിൽ ഉൾപ്പെടുത്തിയ എലികളിൽ മറ്റുള്ളവയെ സംബന്ധിച്ച് മസ്തിഷ്കത്തിന്റെ ആരോഗ്യവും കുറഞ്ഞുവന്നുവെന്ന് ഗവേഷകർ പറയുന്നു.
ഉയർന്ന അളവിൽ എണ്ണ വീണ്ടും വീണ്ടും ചൂടാക്കുകവഴി അവയിലെ സ്വാഭാവിക കെമിക്കൽ ഘടനയിൽ മാറ്റമുണ്ടാവുകയും ഗുണകരമായ ആന്റിഓക്സിഡന്റുകൾ കുറച്ച് ട്രാൻസ്ഫാറ്റുകൾ പോലുള്ള ഉപദ്രവകാരികളായ ഘടകങ്ങൾ കൂടുകയും ചെയ്യും.
എണ്ണ ചൂടാക്കുംതോറും അവയിലെ ആരോഗ്യവശങ്ങൾ ഇല്ലാതാവുകയും ഓരോതവണയും ഹാനികരമാകുന്ന ഘടകങ്ങൾ രൂപപ്പെടുകയും ചെയ്യുമെന്നും ഗവേഷകർ പറയുന്നു.
