നിരവധി പോഷക ഗുണങ്ങളുടെ കലവറയാണ് നെല്ലിക്ക (Indian Gooseberry). വിറ്റാമിനുകളും ആന്റി ഓക്സിഡന്റുകളും നെല്ലിക്കയിൽ അടങ്ങിയിരിക്കുന്നു. ഔഷധമൂല്യങ്ങളാല് സമ്പന്നമായ നെല്ലിക്കയെ ആയുർവേദത്തിൽ അമൃത്, സഞ്ജീവനി എന്നൊക്കെയാണ് പറയുന്നത്.
രാവിലെ വെറും വയറ്റിൽ ഒരു നെല്ലിക്ക കഴിക്കുന്നത് ശരീരത്തിന്റെ പ്രതിരോധശേഷി വർധിപ്പിക്കുകയും ശരീരത്തെ പല രോഗങ്ങളിൽ നിന്ന് സംരക്ഷിക്കുകയും ചെയ്യുന്നു.
നെല്ലിക്ക കഴിക്കുന്നതും നെല്ലിക്കയുടെ ജ്യൂസ് കുടിക്കുന്നതും ആരോഗ്യത്തിന് ഏറെ ഗുണം ചെയ്യുന്നത് പോലെ തന്നെ ചർമ്മത്തിന്റെയും മുടിയുടെയും സംരക്ഷണത്തിനും ഉത്തമമായി കണക്കാക്കുന്നു.
ശീതകാലം ആരംഭിക്കുന്നതോടെ വിപണിയിൽ സുലഭമാകുന്ന നെല്ലിക്ക വർഷം മുഴുവനും അച്ചാർ, ഉപ്പിലിട്ടത്, പൊടിച്ചത്, ഉണക്കിയത്, ജ്യൂസ് എന്നിങ്ങനെ പല രൂപത്തിലും ലഭ്യമാണ്. ആയുർവേദവും പ്രകൃതി ചികിത്സയും അനുസരിച്ച് നെല്ലിക്ക ഒരു അത്ഭുത ഭക്ഷണമായി കണക്കാക്കുന്നു.
രാവിലെ വയർ ശൂന്യമായിരിക്കുമ്പോൾ നെല്ലിക്ക കഴിക്കുന്നത് അതിലെ പോഷകങ്ങളും വൈറ്റമിൻ സിയും ആന്റിഓക്സിഡന്റുകളും ശരീരത്തിലേക്ക് കൂടുതൽ വേഗത്തിലും ഫലപ്രദമായും ആഗിരണം ചെയ്യാൻ സഹായിക്കും. വെറും വയറ്റിൽ നെല്ലിക്ക കഴിക്കുന്നതുകൊണ്ടുള്ള 5 പ്രധാന ആരോഗ്യ ഗുണങ്ങൾ എന്തൊക്കെയാണെന്ന് നോക്കാം.
രക്തത്തിലെ പഞ്ചസാരയുടെ അളവ് നിയന്ത്രിക്കുന്നു
നെല്ലിക്കയിൽ അടങ്ങിയിരിക്കുന്ന ചില പ്രത്യേക ഘടകങ്ങൾ ശരീരത്തിലെ ഇൻസുലിൻ പ്രവർത്തനത്തെയും ഗ്ലൂക്കോസ് മെറ്റബോളിസത്തെയും മെച്ചപ്പെടുത്താൻ സഹായിക്കുന്നു.
ഇത് രക്തത്തിലെ പഞ്ചസാരയുടെ അളവ് കൃത്യമായി നിലനിർത്താൻ സഹായിക്കുമെന്നതിനാൽ പ്രമേഹമുള്ളവർക്കും ഇത് ഭക്ഷണക്രമത്തിൽ ഉൾപ്പെടുത്താവുന്നതാണ്.
തിളങ്ങുന്ന ചർമ്മവും കൊളാജൻ ഉത്പാദനവും
വൈറ്റമിൻ സിയുടെ കലവറയാണ് നെല്ലിക്ക. ചർമ്മത്തിന്റെ ഇലാസ്തികത നിലനിർത്തുന്നതിനും വാർധക്യ ലക്ഷണങ്ങളെ തടയുന്നതിനും സഹായിക്കുന്ന കൊളാജൻ എന്ന പ്രോട്ടീന്റെ ഉത്പാദനത്തിന് വൈറ്റമിൻ സി അത്യാവശ്യമാണ്. ദിവസവും നെല്ലിക്ക കഴിക്കുന്നത് ചർമ്മത്തിന് സ്വാഭാവിക തിളക്കം നൽകാനും ആരോഗ്യമുള്ളതാക്കാനും സഹായിക്കും.
രാവിലെ വെറും വയറ്റിൽ പച്ചനെല്ലിക്ക കഴിക്കുന്നത് ദഹന പ്രക്രിയയെ സുഗമമാക്കും. നെല്ലിക്കയിലെ നാരുകളും മറ്റ് പ്രകൃതിദത്ത ഘടകങ്ങളും കുടലിന്റെ ആരോഗ്യം സംരക്ഷിക്കുകയും, വയർ വീർക്കുന്ന അവസ്ഥ, ഗ്യാസ് തുടങ്ങിയ ദഹനസംബന്ധമായ ബുദ്ധിമുട്ടുകൾ കുറയ്ക്കാൻ സഹായിക്കുകയും ചെയ്യുന്നു.
4. മാനസിക സമ്മർദത്തിനും വീക്കത്തിനുമെതിരെ പ്രതിരോധം
അന്തരീക്ഷ മലിനീകരണം, മോശം ഭക്ഷണശീലങ്ങൾ, അശാസ്ത്രീയമായ ജീവിതശൈലി എന്നിവ കാരണം ശരീരത്തിലുണ്ടാകുന്ന ഓക്സിഡേറ്റീവ് സ്ട്രെസിനെ പ്രതിരോധിക്കാൻ നെല്ലിക്കയിലെ ഉയർന്ന അളവിലുള്ള ആന്റിഓക്സിഡന്റുകൾക്ക് സാധിക്കും. ഇത് ശരീരത്തിലുണ്ടാകുന്ന വീക്കങ്ങളും മറ്റ് ആരോഗ്യപ്രശ്നങ്ങളും കുറയ്ക്കാൻ സഹായിക്കുന്നു.
കരളിന്റെ ആരോഗ്യവും വിഷാംശം പുറന്തള്ളലും
ശരീരത്തിലെ വിഷാംശങ്ങളെ സ്വാഭാവികമായി പുറന്തള്ളാനുള്ള കരളിന്റെ പ്രവർത്തനങ്ങൾക്ക് നെല്ലിക്ക വലിയ പിന്തുണ നൽകുന്നു. നെല്ലിക്കയിലുള്ള പോഷകങ്ങൾ ശരീരത്തെ ആന്തരികമായി ശുദ്ധീകരിക്കാനും മെറ്റബോളിസം വർധിപ്പിക്കാനും സഹായിക്കും.
