ഡല്‍ഹി: ഇൻഡ്യ മുന്നണിയില്‍ മുസ്‌ലിം ലീഗിന് കടുത്ത അവഗണന നേരിടുന്നതായി പാർട്ടി നേതൃത്വത്തിന് പരാതി.
മുന്നണിയുടെ ഭാഗമായി സംഘടിപ്പിക്കുന്ന പ്രധാന പരിപാടികളിലും സമിതികളിലും പാർട്ടി പ്രതിനിധികളെ തഴയുന്നതില്‍ ലീഗിനകത്ത് വലിയ അതൃപ്തി പുകയുന്നതായാണ് റിപ്പോർട്ട്.
പ്രതിപക്ഷ പാർട്ടികളുടെ നേതൃത്വത്തില്‍ നടന്ന മഹാറാലിയില്‍ മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി ഉള്‍പ്പെടെയുള്ള നേതാക്കള്‍ ഉണ്ടായിരുന്നിട്ടും സംസാരിക്കാൻ അവസരം നല്‍കിയില്ലെന്നതാണ് പ്രധാന ആക്ഷേപം.
ഇതിനുപുറമെ, വിവിധ വിഷയങ്ങള്‍ ഉന്നയിച്ച്‌ രാഷ്ട്രപതിയെ സന്ദർശിച്ച പ്രതിപക്ഷ സംഘത്തിലും ലീഗ് പ്രതിനിധികളെ ഉള്‍പ്പെടുത്തിയിരുന്നില്ല. ഇൻഡ്യ മുന്നണിയുടെ വിദ്യാർഥി-യുവജന കോർഡിനേഷൻ കമ്മിറ്റി രൂപീകരിച്ചപ്പോഴും മുസ്‌ലിം ലീഗിന്റെ പോഷക സംഘടനകളായ യൂത്ത് ലീഗിനെയും എംഎസ്‌എഫിനെയും പൂർണമായും മാറ്റിനിർത്തി.
ദേശീയതലത്തില്‍ തുടർച്ചയായി നേരിടുന്ന ഈ അവഗണനയില്‍ പാർട്ടി നേതൃത്വത്തിന് കടുത്ത അമർഷമുണ്ട്.
