ചങ്ങരംകുളം: മൂന്നാറില്‍ വിനോദയാത്ര പോയി മടങ്ങിവരുകയായിരുന്ന സംഘം സഞ്ചരിച്ച ബസുകള്‍ കൂട്ടിയിടിച്ച്‌ അഞ്ചുപേർക്ക് പരിക്ക്.
പെരിന്തല്‍മണ്ണ മക്കരപ്പറമ്പ് സ്വദേശികളായ റിൻഷ (15), അംജാദ് (22), അബ്ദുല്‍ സലാം (44), മുഹമ്മദ് റയാൻ (15), റാസി (10) എന്നിവർക്കാണ് പരിക്കേറ്റത്.
പരിക്കേറ്റവരെ ഉടൻതന്നെ ചങ്ങരംകുളം ഓർക്കിഡ് ആശുപത്രിയില്‍ പ്രവേശിപ്പിച്ചു. ഇവർക്ക് വിദഗ്ധ ചികിത്സ നല്‍കിവരികയാണെന്നും ആരുടെയും പരിക്ക് ഗുരുതരമല്ലെന്നും ആശുപത്രി അധികൃതർ അറിയിച്ചു.
ബുധനാഴ്ച പുലർച്ചെ 5.30-ഓടെ കുറ്റിപ്പുറം-തൃശൂർ സംസ്ഥാന പാതയില്‍ ചങ്ങരംകുളം ചിയ്യാനൂർ പാടത്തിന് സമീപം മാർസ് സിനിമാസിന് മുൻവശത്തുവെച്ചായിരുന്നു അപകടം നടന്നത്. റോഡിലെ ഹമ്പിന് മുന്നില്‍ വെച്ച്‌ മുൻപില്‍ പോവുകയായിരുന്ന ടൂറിസ്റ്റ് ബസ് പെട്ടെന്ന് ബ്രേക്കിട്ടതിനെ തുടർന്ന്, പിന്നില്‍ വന്ന മറ്റൊരു ടൂറിസ്റ്റ് ബസ് ഇതിന്റെ പുറത്തേക്ക് ഇടിക്കുകയായിരുന്നു.
വിവരമറിഞ്ഞ് ഉടൻതന്നെ ചങ്ങരംകുളം പൊലീസ് സ്ഥലത്തെത്തി ഗതാഗതം പുനഃസ്ഥാപിക്കുകയും ആവശ്യമായ മേല്‍നടപടികള്‍ സ്വീകരിക്കുകയും ചെയ്തു
