തിരുവനന്തപുരം: കള്ളപ്പണ ഇടപാടുമായി ബന്ധപ്പെട്ട ഇഡി റിപ്പോർട്ടില് സംസ്ഥാന സർക്കാർ അന്വേഷണം പ്രഖ്യാപിച്ചതില് പ്രതികരണവുമായി മുൻ മന്ത്രി പി.എ മുഹമ്മദ് റിയാസ്.
താൻ ഒരു തെറ്റും ചെയ്തിട്ടില്ലെന്നും പൂർണ ആത്മവിശ്വാസത്തോടെ വിഷയത്തെ നേരിടും, അതേസമയം കോണ്ഗ്രസ് നയിക്കുന്ന സംസ്ഥാന സർക്കാർ ഇഡി റിപ്പോർട്ട് വിശ്വാസത്തിലെടുത്ത് അന്വേഷണത്തിന് തീരുമാനമെടുത്തതിനെക്കുറിച്ച് പൊതുസമൂഹം ചർച്ച ചെയ്യുമെന്നും അദ്ദേഹം മാധ്യമങ്ങളോട് പറഞ്ഞു.
ആരെയും ഭയപ്പെടുത്താനോ അനാവശ്യ കഥകള് മെനയാനോ ശ്രമിച്ചാലും ഒരു തെറ്റും ചെയ്യാത്തതിനാല് ഭയപ്പെടേണ്ട സാഹചര്യമില്ലെന്നും ജീവിതത്തില് കണ്ടിട്ടുപോലുമില്ലാത്ത ആളുകളെ ഉള്പ്പെടുത്തി വ്യാജ കഥകള് നിർമ്മിക്കുകയാണ് ചെയ്തതെന്നും തനിക്ക് ഒന്നും ഭയപ്പെടാനില്ലെന്നും അദ്ദേഹം പറഞ്ഞു. അതുപോലെ ആളുകളെ ഭയപ്പെടുത്തിയും മറ്റും പല തരത്തിലുമാണ് ഇഡി മൊഴിയെടുത്തുവെന്നും അദ്ദേഹം ആരോപിച്ചു. സംഭവവുമായി ബന്ധപ്പെട്ട് വരുന്ന വ്യാജവാർത്തകള്ക്കെതിരെ നിയമപരമായ നടപടികള് സ്വീകരിച്ചിട്ടുണ്ടെന്നും വക്കീല് നോട്ടീസ് അയച്ചിട്ടുണ്ടെന്നും അദ്ദേഹം വ്യക്തമാക്കി
ഇന്ത്യയില് പല ഇടങ്ങളിലും ഇഡി അന്വേഷണം, മൊഴിയെടുക്കുന്ന രീതി ഇതൊക്കെ ബിജെപി ഇതര രാഷ്ട്രീയപാർട്ടികള് ശക്തമായി എതിർത്തിട്ടുണ്ട്. ഇതില് മുൻപന്തിയില് നിന്ന രാഷ്ട്രീയപ്പാർട്ടിയാണ് കോണ്ഗ്രസെന്നും അദ്ദേഹം ആരോപിച്ചു. അതേസമയം മുൻ മുഖ്യമന്ത്രി പിണറായി വിജയൻ, മകള് ടി. വീണ, മരുമകനും എംഎല്എയുമായ മുഹമ്മദ് റിയാസ് എന്നിവർക്കെതിരെ ഇഡി നല്കിയ റിപ്പോർട്ടിന്റെ അടിസ്ഥാനത്തില് അന്വേഷണം നടത്താനാണ് ആഭ്യന്തര മന്ത്രി ക്രൈംബ്രാഞ്ച് എസ്ഐടിക്ക് നിർദേശം നല്കിയത്. മുഖ്യമന്ത്രി വി.ഡി സതീശനുമായി നടന്ന കൂടിക്കാഴ്ചക്ക് ശേഷമാണ് ചെന്നിത്തല നിർദേശം നല്കിയത്. ഡിജിപിയുടെ നേതൃത്വത്തിലായിരിക്കും അന്വേഷണം. എഫ്ഐആർ രജിസ്റ്റർ ചെയ്യണമോ എന്നതില് ഡിജിപി തീരുമാനമെടുക്കും. ആവശ്യമെങ്കില് എഫ്ഐആറിന് മുമ്പ് പ്രാഥമിക അന്വേഷണം നടത്താനും നിയമോപദേശം ലഭിച്ചിട്ടുണ്ട്.
