ടുമ്പാശ്ശേരി: എറണാകുളം നെടുമ്പാശ്ശേരിയില്‍ മിനികൂപ്പർ കാർ സ്കൂട്ടറിലിടിച്ച്‌ മൂന്ന് പേർക്ക് ദാരുണാന്ത്യം.
ഇന്ന് പുലർച്ചെയാണ് അപകടം ഉണ്ടായത്. ഇയാസ്, ഗോപിക, ദേവിക എന്നിവരാണ് മരിച്ചത്. അമിത വേഗത്തില്‍ കാർ ഓടിച്ച സുഹൈലിനെ, നാട്ടുകാർ പിടികൂടി പൊലീസില്‍ ഏല്‍പ്പിക്കുകയായിരുന്നു. സുഹൈലിനെതിരെ പൊലീസ് നരഹത്യയ്ക്ക് കേസെടുത്തു. മദ്യപിച്ചിരുന്നെന്ന് സുഹൈല്‍ പൊലീസിനോട് സമ്മതിച്ചു. വാഹനം അമിതവേഗത്തില്‍ ആയിരുന്നെന്ന് പൊലീസ് വ്യക്തമാക്കി. രാജഗിരി കോളേജിലെ ബികോം വിദ്യാർത്ഥിയാണ് സുഹൈല്‍. രാസലഹരി ഉപയോഗിച്ചോ എന്നറിയാൻ ശാസ്ത്രീയ പരിശോധന നടത്തും.
സ്‌കൂട്ടറില്‍ സഞ്ചരിക്കുകയായിരുന്ന സുഹൃത്തുക്കളുടെ പിന്നില്‍ അമിതവേഗത്തിലെത്തിയ മിനി കൂപ്പർ കാർ ഇടിച്ചുകയറിയാണ് അപകടമുണ്ടായത്. തൃക്കാക്കരയിലേക്ക് മടങ്ങുന്നതിനിടെയാണ് അപകടം സംഭവിച്ചത്. അപകടത്തില്‍ മൂന്നുപേരും സംഭവസ്ഥലത്തുവെച്ചുതന്നെ മരണപ്പെടുകയായിരുന്നു. സംഭവത്തിന് പിന്നാലെ പ്രതി നാട്ടുകാരോട് തർക്കിക്കുകയും വെല്ലുവിളിക്കുകയും ചെയ്തു. എയർപോർട്ട് റോഡില്‍ വേഗതയില്‍ ഓടിച്ചാല്‍ എന്താണ് കുഴപ്പമെന്നും അച്ഛൻ നോക്കിക്കൊള്ളുമെന്നും പറഞ്ഞായിരുന്നു നാട്ടുകാരോട് തട്ടിക്കയറിയത്.
അപകടത്തില്‍ ഗതാഗത മന്ത്രി സിപി ജോണ്‍ റിപ്പോർട്ട് തേടി. റോഡ് സേഫ്റ്റി കമ്മീഷണറോട് ആണ് റിപ്പോർട്ട് തേടിയത്. അടിയന്തര പ്രാധാന്യത്തില്‍ റിപ്പോർട്ട് കൈമാറാൻ നിർദേശം. റിപ്പോർട്ട് ലഭിച്ചതിന് ശേഷം തുടർനടപടികള്‍ വേഗത്തിലാക്കും. പ്രതി സുഹൈല്‍ സജീവ് മൂന്ന് ബാറില്‍ കയറി മദ്യപിച്ചെന്ന് പൊലീസ് പറഞ്ഞു. മദ്യപിക്കുന്നതിന്റെ വീഡിയോയും മൊബൈലില്‍ ചിത്രീകരിച്ചു. പൊലീസ് എഫ്‌ഐആറിലാണ് ഇക്കാര്യങ്ങള്‍ വിശദീകരിക്കുന്നത്.
