തിരുവനന്തപുരം: ഫുട്ബാള്‍ താരം ലയണല്‍ മെസിയെ കേരളത്തില്‍ കൊണ്ടുവരുന്നതുമായി ബന്ധപ്പെട്ട സാമ്പത്തിക തട്ടിപ്പ് കേസില്‍ മുൻ കായികമന്ത്രി വി അബ്ദുറഹ്മാനും അന്നത്തെ സർക്കാർ ഉദ്യോഗസ്ഥർക്കും എതിരെ അന്വേഷണാനുമതി തേടി സംസ്ഥാന പൊലീസ് മേധാവി സർക്കാരിന് റിപ്പോർട്ട് നല്‍കി.
എഡിജിപി പി വിജയന്റെ നേതൃത്വത്തില്‍ നടന്ന അന്വേഷണത്തില്‍ മുൻമന്ത്രിക്കും ഉദ്യോഗസ്ഥർക്കും എതിരെ ഗുരുതരമായ കണ്ടെത്തലുകളാണുള്ളതെന്നാണ് വിവരം.
ഈ റിപ്പോർട്ട് പരിശോധിച്ച ശേഷമാണ് സംസ്ഥാന പൊലീസ് മേധാവി റവാഡ ചന്ദ്രശേഖർ സർക്കാരിലേക്ക് നിർണായക ഫയല്‍ കൈമാറിയത്.
വി അബ്ദുറഹ്മാനും ഉദ്യോഗസ്ഥർക്കും എതിരെ അഴിമതി നിരോധന നിയമം ചുമത്തി തുടരന്വേഷണം നടത്താനുള്ള അനുമതിയാണ് പൊലീസ് ആവശ്യപ്പെട്ടിരിക്കുന്നത്.
ഫുട്ബോള് സ്‌പോണ്‍സർഷിപ്പുമായി ബന്ധപ്പെട്ട കരാറിലും സ്‌പോണ്‍സറെ കണ്ടെത്തിയതിലും അർജന്റീന ഫുട്ബോള് അസോസിയേഷനുമായുള്ള ഇടപാടുകളിലും അബ്ദുറഹ്‌മാൻ ചട്ടവിരുദ്ധവും ക്രമരഹിതവുമായ ഇടപെടലുകള്‍ നടത്തിയതായി അന്വേഷണസംഘം വിലയിരുത്തിയിട്ടുണ്ട്.
