കായംകുളം: ഓണാഘോഷത്തോടനുബന്ധിച്ച് കായംകുളം പൊലീസ് നടത്തിയ വ്യാപക പരിശോധനയില് 35.95 ഗ്രാം എംഡിഎംഎയുമായി രണ്ടുപേർ പിടിയില്.
ഓപ്പറേഷൻ തൂഫാന്റെ ഭാഗമായി ഉത്രാട ദിനത്തില് നടത്തിയ പരിശോധനയിലാണ് കരുനാഗപ്പള്ളി കുലശേഖരപുരം കടത്തൂർ മുറിയില് ആകാശ് ഭവനത്തില് ആകാശ് (21), കൂട്ടാളിയായ ക്ലാപ്പന കോലെടുത്ത് വീട്ടില് സജിമോൻ (37) എന്നിവർ അറസ്റ്റിലായത്.
കായംകുളം കെഎസ്ആർടിസി പരിസരത്തുനിന്നും ഓഗസ്റ്റ് 26 വെളുപ്പിന് മൂന്ന് മണിയോടെ സംശയാസ്പദമായ രീതിയില് കണ്ട കെ എല് 23 എല് 3665 നമ്പർ മോട്ടോർ സൈക്കിള് പരിശോധിച്ചപ്പോഴാണ് ഒന്നാം പ്രതിയായ ആകാശിനെ മയക്കുമരുന്നുമായി പിടികൂടിയത്. തുടർന്ന് നടത്തിയ അന്വേഷണത്തിലാണ് സജിമോൻ വലയിലായത്. ഓണക്കാലത്തെ വില്പന ലക്ഷ്യമിട്ട് കടത്തിക്കൊണ്ടുവന്ന ഈ മയക്കുമരുന്നിന് ആഭ്യന്തര വിപണിയില് ഏകദേശം നാല് ലക്ഷത്തോളം രൂപ വിലവരും. ആകാശ് ചവറ പൊലീസ് സ്റ്റേഷനില് ഒരു മോഷണക്കേസിലും പ്രതിയാണ്. കോടതിയില് ഹാജരാക്കിയ പ്രതികളെ ജുഡീഷ്യല് കസ്റ്റഡിയില് റിമാൻഡ് ചെയ്തു.
കായംകുളം ഡിവൈഎസ്പി ടി രാജപ്പന്റെ മേല്നോട്ടത്തില് സിഐ രജീഷ് കുമാർ, എസ്ഐമാരായ രതീഷ് ബാബു, സുരേഷ്, എഎസ്ഐമാരായ ഇസ്ലാഹ്, പ്രിയ, ഷിബു, സിവില് പൊലീസ് ഉദ്യോഗസ്ഥരായ മോനിഷ്, ആദർശ്, ശ്യാം, അഖില് മുരളി, മനു എന്നിവരടങ്ങിയ സംഘമാണ് പ്രതികളെ പിടികൂടി അന്വേഷണം നടത്തിയത്. ഓണക്കാലത്തോടനുബന്ധിച്ച് അനധികൃത ലഹരികടത്തിനും വില്പനയ്ക്കുമെതിരെയുള്ള പരിശോധന കർശനമാക്കിയതായി കായംകുളം പൊലീസ് അറിയിച്ചു.
