തിരുവനന്തപുരം: സിഎംആർഎല്‍ എക്സാലോജിക് ഇടപാടുമായി ബന്ധപ്പെട്ട് ഹൈക്കോടതി ഡിവിഷൻ ബഞ്ചിന്റെ ഉത്തരവിനെ സ്വാഗതം ചെയ്യുന്നതായി മാത്യുകുഴല്‍ നാടൻ പറഞ്ഞു.
പിണറായി വിജയൻ വിചാരണ നേരിടുക എന്നതാണ് ഏറ്റവും അഭികാമ്യം. മടിയില്‍ കനമില്ലെങ്കില്‍ അന്വേഷണത്തെ എന്തിനാണ് ഭയക്കുന്നതെന്നും മാത്യു കുഴല്‍നാടൻ ചോദിച്ചു.
അതേസമയം പിണറായി വിജയന് അനുകൂലമായ ഹൈക്കോടതിയിലെ സർക്കാർ നിലപാട് മാത്യു കുഴല്‍ നാടൻ തള്ളി. കോടതിയിലെ സർക്കാർ നിലപാട് തെറ്റെന്ന് തെളിഞ്ഞു. എന്തുകൊണ്ട് എജി അങ്ങനെയൊരു നിലപാട് എടുത്തുവെന്ന് വ്യക്തമല്ല. ബന്ധപ്പെട്ടവർ ഇക്കാര്യം പാർട്ടി വേദിയില്‍ വിശദീകരിക്കുമെന്നാണ് താൻ പ്രതീക്ഷിക്കുന്നതെന്ന് മാത്യു കുഴല്‍നാടൻ പറഞ്ഞു. പരിശോധിക്കേണ്ടത് ഹർജിക്കാരന്റെ വിശ്വാസ്യതയല്ലെന്നും വിമർശനം.
പ്രഥമദൃഷ്ട്യാ എഫ്‌ഐആർ നിലനില്‍ക്കില്ലെന്ന് എന്തടിസ്ഥാനത്തിലാണ് നിലപാട് എടുത്തതെന്ന് അറിയില്ല. ഈ കാര്യത്തില്‍ ന്യായമായ നിലപാടല്ല വേണ്ടത് നിയമപരമായ നിലപാടാണ് സ്വീകരിക്കേണ്ടത്. എന്ത് മെറ്റീരിയല്‍ റെക്കോർഡ് ഉണ്ടായിട്ടാണ് പിണറായി വിജയൻ നേരത്തെ എനിക്കെതിരെ കേസ് എടുത്തത്. പിണറായി വിജയനെതിരെ ഇപ്പോള്‍ കേസെടുക്കുമ്പോള്‍ എന്തിനാണ് വെപ്രാളപ്പെടുന്നതെന്ന് മാത്യു കുഴല്‍നാടൻ ചോദിച്ചു.
എഫ്‌ഐആർ എടുത്ത് അന്വേഷണം നടത്താൻ തുടങ്ങിയപ്പോള്‍ പിണറായി വിജയന് വെപ്രാളമായെന്ന് മാത്യു കുഴല്‍നാടൻ കുറ്റപ്പെടുത്തി. മകള്‍ക്കെതിരെ അന്വേഷണം വരുമ്പോള്‍ പിണറായി വിജയൻ്റെ വെപ്രാളമാണ് ഇപ്പോള്‍ കാണാൻ കഴിയുന്നത്. പിണറായി വിജയനെ ഈ സമയത്ത് ആക്ഷേപിക്കാൻ ഞാൻ ഇല്ലെന്നും പിണറായി വിജയൻ്റെ പ്രായത്തെ പരിഗണിച്ച്‌ ഞാൻ ഇപ്പോള്‍ കൂടുതലൊന്നും പറയുന്നില്ലെന്നും അദേഹം പറഞ്ഞു. തനിക്കെതിരെ നേരത്തെ പറഞ്ഞ കാര്യങ്ങള്‍ സിപിഐഎമ്മിനും ആത്മപരിശോധന നടത്താവുന്നതാണ്. അന്ന് പിണറായി വിജയൻ അടക്കമുള്ളവർ പറഞ്ഞ കാര്യം ശാന്തമായി അദ്ദേഹത്തെ ഒന്ന് ഓർമ്മപ്പെടുത്തിയത് മാത്രമാണെന്ന് അദേഹം കൂട്ടിച്ചേർത്തു.
