തിരുവനന്തപുരം: പ്രേക്ഷകർ ഏറെ ആകാംക്ഷയോടെ കാത്തിരുന്ന രജനീകാന്ത് ചിത്രം 'ജയിലർ 2' തിയേറ്ററുകളിലെത്തി. രാവിലെ 6 മണിക്ക് തുടങ്ങിയ ആദ്യ ഷോയ്ക്ക് ശേഷം മികച്ച പ്രതികരണമാണ് ചിത്രത്തിന് ലഭിക്കുന്നത്.
ആദ്യ പകുതിയില്‍ ഗംഭീര വരവേല്‍പ്പാണ് രജനികാന്തിന്റെ കഥാപാത്രത്തിന് ലഭിക്കുന്നതെന്നും ചിത്രത്തിലെ കോമഡി രംഗങ്ങള്‍ നന്നായി വർക്കായെന്നും പ്രേക്ഷകർ അഭിപ്രായപ്പെടുന്നു. മോഹൻലാലിന്റെ ക്യാമിയോ വേഷത്തിന് തിയേറ്ററുകളില്‍ വലിയ സ്വീകാര്യതയാണ് ലഭിക്കുന്നത്. കൂടാതെ ചിത്രത്തിലെ മറ്റ് താരങ്ങളുടെ പ്രകടനങ്ങളും മികച്ചതാണെന്ന് പ്രേക്ഷകർ പറയുന്നു. അനിരുദ്ധിന്റെ സംഗീതവും പശ്ചാത്തല സംഗീതവും ചിത്രത്തിന്റെ മാസ് നിമിഷങ്ങളെ ഉയർത്താൻ ഏറെ സഹായിച്ചെന്നും സിനിമയുടെ ടെക്നിക്കല്‍ വശങ്ങള്‍ വളരെ നിലവാരം പുലർത്തുന്നുണ്ടെന്നും അഭിപ്രായങ്ങളുണ്ട്.
കേരളത്തില്‍ 4000 സ്‌ക്രീനുകളിലാണ് ചിത്രം പ്രദർശിപ്പിക്കുന്നത്. പ്രീ-സെയില്‍സ് വഴിമാത്രം ചിത്രം 8 കോടി രൂപയ്ക്ക് മുകളില്‍ നേടിയിട്ടുണ്ട്. ചിത്രത്തിന് മികച്ച പ്രതികരണങ്ങള്‍ ലഭിക്കുന്നതിനാല്‍ ബോക്സ് ഓഫീസില്‍ കളക്ഷൻ കൂടുതല്‍ ഉയരാൻ സാധ്യതയുണ്ട്. ഡിസ്ട്രിക്റ്റ് ആപ്പിന്റെ കേരളത്തിലെ പ്രീ-ബുക്കിങ് ചരിത്രത്തില്‍ ആദ്യമായാണ് ഒരു ചിത്രത്തിന്റെ 12,000-ത്തിലധികം ടിക്കറ്റുകള്‍ ആദ്യ ഒരു മണിക്കൂറില്‍ വിറ്റുപോകുന്നത്. ബുക്ക് മൈ ഷോ, ഡിസ്ട്രിക്റ്റ് ബൈ സൊമാറ്റോ, ടിക്കറ്റ് ന്യൂ എന്നീ ആപ്പുകള്‍ വഴിയും കൗണ്ടർ വില്‍പന വഴിയുമായി ആദ്യ മണിക്കൂറില്‍ ചിത്രത്തിന്റെ 1 ലക്ഷത്തിലധികം ടിക്കറ്റുകളാണ് കേരളത്തില്‍ മാത്രം വിറ്റഴിച്ചത്.
സണ്‍ പിക്ചേഴ്സിന്റെ ബാനറില്‍ കലാനിധി മാരൻ നിർമ്മിക്കുന്ന ചിത്രം കേരളത്തില്‍ ശ്രീ ഗോകുലം ഗോപാലന്റെ ശ്രീ ഗോകുലം മൂവീസാണ് വിതരണം ചെയ്യുന്നത്. ചിത്രത്തിലെ നായകൻ രജനികാന്താണെങ്കിലും മലയാളികള്‍ ഉള്‍പ്പെടെയുള്ള ഒരു വിഭാഗം പ്രേക്ഷകർ ഏറെ ആകാംക്ഷയോടെ കാത്തിരുന്നത് മോഹൻലാലിന്റെ കഥാപാത്രത്തിനായാണ്. ചിത്രത്തിന്റെ ട്രെയിലറില്‍ ഏതാനും നിമിഷങ്ങള്‍ മാത്രമാണ് ലാലേട്ടൻ പ്രത്യക്ഷപ്പെട്ടതെങ്കിലും യൂട്യൂബിലെ കമന്റ് ബോക്സ് മുഴുവൻ മോഹൻലാല്‍ ആരാധകർ ഇതിനോടകം കൈയടക്കിയിരുന്നു.
