കൊച്ചി: ചെക്ക് കേസില്‍ മൂന്നര വർഷം തടവിന് ശിക്ഷിക്കപ്പെട്ട മാണി സി കാപ്പനെ അയോഗ്യനാക്കണമെന്ന പരാതിയില്‍ ഉചിതമായ തീരുമാനമെടുക്കാൻ സ്പീക്കർക്ക് ഹൈക്കോടതി നിർദേശം.
കേസിലെ പരാതിക്കാരൻ പരാതിക്കാരനായ ദിനേശ് മേനോൻ നല്‍കിയ ഹർജി ഹൈകോടതി തീ‍ർപ്പാക്കി. സ്പീക്കറോട് ഉചിതമായ തീരുമാനം എടുക്കാൻ ഹൈക്കോടതി നിർദേശിച്ചു. അതല്ല ഗവർണറാണ് തീരുമാനം എടുക്കേണ്ടതെങ്കില്‍ അങ്ങോട്ട് കൈമാറാനും കോടതി നിർദേശം നല്‍കി. തീരുമാനം എന്താണെങ്കിലും വൈകരുതെന്നാണ് കോടതി വ്യക്തമാക്കിയിരിക്കുന്നത്.
പ്രവാസി വ്യവസായി ദിനേശ് മേനോണ് ഹർജിക്കാരൻ. മാണി സി കാപ്പനെതിരെ കോടതി ശിക്ഷ വിധിച്ചിട്ടും സ്പീക്കറും തിരഞ്ഞെടുപ്പ് കമ്മീഷനും നടപടി സ്വീകരിച്ചില്ലെന്നും ഹര്‍ജിയില്‍ പറയുന്നു. പാലാ നിയമസഭാ സീറ്റ് ഒഴിഞ്ഞതായി സ്പീക്കര്‍ വിജ്ഞാപനമിറക്കണമെന്നും, പാലായില്‍ ഉപതിരഞ്ഞെടുപ്പ് നടത്താന്‍ തിരഞ്ഞെടുപ്പ് കമ്മിഷനോട് നിര്‍ദേശിക്കണമെന്നുമാണ് ദിനേശ് മേനോൻ്റെ വാദം. എന്നാല്‍ ഹർജി നിലനില്‍ക്കില്ലെന്നാണ് മാണി സി കാപ്പന്റെ എതിർ സത്യവാങ്മൂലം നല്‍കി. നാലു കേസുകളിലായി മൂന്നര വര്‍ഷം തടവും 5.30 കോടി രൂപ പിഴയുമാണ് മാണി സി കാപ്പന് കോടതി പ്രത്യേകം പ്രത്യേകം ശിക്ഷ വിധിച്ചത്.
