തിരുവനന്തപുരം: ശബരിമല സീസണൊഴികെയുള്ള ദിവസങ്ങളില്‍ ടിക്കറ്റ് വരുമാനത്തില്‍ കെ.എസ്.ആർ.ടി.സിക്ക് രണ്ടാമത്തെ വലിയ നേട്ടം.
വ്യാഴാഴ്ച 10.64 കോടിയുടെ വരുമാനമാണ് കോർപറേഷൻ സ്വന്തമാക്കിയത്. ഇതില്‍ പ്രിയദർശിനി സർവീസുകളുടെ വരുമാനം മാറ്റിയാലും മറ്റ് സർവീസുകളില്‍ നിന്നായി മാത്രം 7.33 കോടി രൂപ നേടാനായി.
ഉത്സവ സീസണുകള്‍ ഫലപ്രദമായി ഉപയോഗപ്പെടുത്തിയതാണ് ഈ നേട്ടത്തിന് കാരണം. വെറ്റ് ലീസ് ബസുകള്‍ കൂടി ഉള്‍പ്പെടുത്തിക്കൊണ്ട് അന്തർസംസ്ഥാന സർവീസുകള്‍ പരമാവധി ഓപ്പറേറ്റ് ചെയ്യാൻ കഴിഞ്ഞു. ഇതിലൂടെയാണ് ശരാശരി 5.77 കോടി രൂപയായിരുന്ന പ്രിയദർശിനി ഇതര സർവീസുകളുടെ വരുമാനം 7.33 കോടിയിലേക്ക് ഉയർന്നത്. കഴിഞ്ഞ വർഷം ഇതേ പൂജാ അവധിക്കാലത്തിന് ശേഷമുള്ള ദിവസത്തില്‍ 9.41 കോടിയായിരുന്നു ടിക്കറ്റ് വരുമാനം. ഇക്കുറി ടിക്കറ്റ് വില്‍പ്പനയില്‍ 1.24 കോടിയിലധികം വർദ്ധനവ് ഉണ്ടായി.
വ്യാഴാഴ്ച 4,612 ബസുകള്‍ ഉപയോഗിച്ച്‌ 16.02 ലക്ഷം കിലോമീറ്ററാണ് സർവീസ് നടത്തിയത്. ഒരു കിലോമീറ്ററിന് ലഭിച്ച ശരാശരി വരുമാനം കഴിഞ്ഞ വർഷത്തെ 58.80 രൂപയില്‍ നിന്ന് 66.44 രൂപയായി ഉയർന്നു. ഒരു ബസില്‍ നിന്നുള്ള ശരാശരി വരുമാനവും 20,094 രൂപയില്‍ നിന്ന് 23,215 രൂപയായി വർധിച്ചു.
ഒറ്റ ദിവസം കൊണ്ട് 30.61 ലക്ഷം യാത്രക്കാരാണ് കെഎസ്‌ആർടിസി ബസുകളെ ആശ്രയിച്ചത്. യാത്രക്കാരുടെ ആവശ്യകത മനസ്സിലാക്കി കൂടുതല്‍ സർവീസുകള്‍ ക്രമീകരിക്കാനും, ലഭ്യമായ ബസുകള്‍ കാര്യക്ഷമമായി ഉപയോഗിച്ച്‌ വരുമാനം വർദ്ധിപ്പിക്കാനുമുള്ള പ്രവർത്തനങ്ങളുമായി മുന്നോട്ടുപോകാനാണ് കോർപ്പറേഷന്റെ തീരുമാനം.
