കോഴിക്കോട്: വിദ്യാർത്ഥികളെ മാനസികമായി പീഡിപ്പിക്കുന്നുവെന്ന പരാതിയില് സ്ഥലം മാറ്റം നടപടി നേരിട്ട അധ്യാപികയ്ക്ക് വകുപ്പിൻ്റെ ചുമതല നല്കിയതിനെതിരെ കോഴിക്കോട് മെഡിക്കല് കോളേജില് പ്രതിഷേധം.
മനശാസ്ത്ര വിഭാഗം ആക്ടിങ് ഹെഡ് ആയ ഡോ. അനിത കുമാരിക്കെതിരെയാണ് പ്രതിഷേധം. വിദ്യാർത്ഥികളുടെ പരാതിയില് നേരത്തെ സ്ഥലം മാറ്റിയെങ്കിലും അഡ്മിനിസ്ട്രേറ്റീവ് ട്രൈബ്യൂണലില് നിന്ന്
അനുകൂല വിധി നേടി തിരികെയെത്തിയതിന് പിന്നാലെയാണ് വകുപ്പിൻ്റെ ചുമതല അനിത കുമാരിക്ക് നല്കിയത്. പൊതുവേദിയിലും രോഗികള്ക്കും മുൻപിലും അപമാനിക്കുന്നു, മാനസികമായി പീഡിപ്പിക്കുന്നു എന്നീ ആരോപണങ്ങള് ഉന്നയിച്ച് 12 പിജി വിദ്യാർത്ഥികള് നല്കിയ പരാതിയിലായിരുന്നു ജൂണ് മാസം ഡോ. അനിത കുമാരിയെ ഇടുക്കി മെഡിക്കല് കോളേജിലേക്ക് സ്ഥലം മാറ്റിയത്. സമാന ആരോപണം നേരിട്ട ഡോ. സ്മിതയെ കൊല്ലം മെഡിക്കല് കോളേജിലേക്കും മാറ്റി. എന്നാല് ഇരുവരും അഡ്മിനിസ്ട്രേറ്റീവ് ട്രൈബ്യൂണലിനെ സമീപിച്ച് അനുകൂല ഉത്തരവ് വാങ്ങി.
സൈക്യാട്രി വകുപ്പ് മേധാവിയും മറ്റൊരു സീനിയർ അധ്യാപകനും അവധിയില് പോയതോടെയാണ് ഡോ. അനിത കുമാരിയെ ആക്ടിങ് എച്ച്ഒഡി ആയി നിയമിച്ചത്. കോളേജിൻ്റെ തീരുമാനത്തില് ശക്തമായ പ്രതിഷേധവുമായി സൈക്യാട്രി വിഭാഗം വിദ്യാർത്ഥികള് രംഗത്തെത്തി. അനിത കുമാരിക്ക് നല്കിയത് താല്ക്കാലിക ചുമതലയാണെന്നും വിദ്യാർത്ഥികളുടെ ആശങ്ക ഡിഎംഇയെ അറിയിക്കുമെന്നും മെഡിക്കല് കോളേജ് പ്രിൻസിപ്പല് അറിയിച്ചു. അതേസമയം, തീരുമാനത്തില് മാറ്റമില്ലെങ്കില് റിലേ സമരത്തിലേക്ക് കടക്കുമെന്നും വിദ്യാർത്ഥികള് വ്യക്തമാക്കി.
