കോട്ടയം: ലോകത്തിന്റെ വിവിധ ഭാഗങ്ങളില്‍ നിന്നായി ഒഴുകിയെത്തിയ ക്‌നാനായ സമുദായംഗങ്ങളുടെ മനം നിറഞ്ഞ പ്രാര്‍ഥനാ മധ്യേ കോട്ടയം രൂപതയ്‌ക്കു പുതിയ സഹായ മെത്രാന്‍ അഭിഷിക്‌തനായി.
വിവിധ സഭാധ്യക്ഷന്‍മാരുടെയും വൈദികരുടെയും കണ്ണൂര്‍ പയ്യാവൂരില്‍ നിന്നുമെത്തിയ സഹോദരങ്ങളുടെയും ബന്ധുക്കളുടെയും സാന്നിധ്യത്തിലാണ്‌ മാര്‍ തോമസ്‌ ആനിമൂട്ടില്‍, ആര്‍ച്ച്‌ ബിഷപ്‌ മാര്‍ മാത്യൂ മൂലക്കാട്ടില്‍ നിന്ന്‌ കൈവയ്‌പു ശുശ്രൂഷയിലൂടെ സഹായ മെത്രാനായി അഭിഷിക്‌തനായത്‌.
ശുശ്രൂഷകള്‍ നടന്ന ക്രിസ്‌തുരാജ്‌ കത്തീഡ്രലില്‍ ബിഷപ്പുമാര്‍, വൈദികര്‍, സന്ന്യസ്‌തര്‍, മാര്‍ തോമസ്‌ ആനിമൂട്ടിലിന്റെ ബന്ധുക്കള്‍, വി.വി.ഐ.പികള്‍ എന്നിവര്‍ നിറഞ്ഞു. പള്ളി മുറ്റത്തും ബി.സി.എം.കോളജ്‌, സെന്റ്‌ ആന്‍സ്‌ കോളജ്‌ പരിസരത്തും ശുശ്രൂഷകള്‍ കാണാന്‍ സംവിധാനം ഒരുക്കിയിരുന്നു. ഇവിടേയ്‌ക്കും വിശ്വാസികള്‍ ഒഴുകിയെത്തി.
ഇന്‍ഡ്യയുടെ അപ്പസ്‌തോലിക ന്യൂണ്‍ഷ്യോ പ്രതിനിധി ഫാ. നിക്കോളാസ്‌ ഗ്രാഫ്‌ വോണ്‍ മാഗ്നിസ്‌, ആര്‍ച്ചു ബിഷപ്പ്‌ മാര്‍ ആന്‍ഡ്രൂസ്‌ താഴത്ത്‌, ആര്‍ച്ചുബിഷപ്‌ റവ. തോമസ്‌ നെറ്റോ, മാര്‍ ജോസഫ്‌ പെരുന്തോട്ടം, മാര്‍ ജോസ്‌ പുത്തന്‍വീട്ടില്‍, മാര്‍ ജോണ്‍ നെല്ലിക്കുന്നേല്‍, മാര്‍ പോളി കണ്ണൂക്കാടന്‍, മാര്‍ ജോസ്‌ പുളിക്കല്‍, മാര്‍ മാത്യു അറയ്‌ക്കല്‍, മാര്‍ ജോര്‍ജ്‌ മഠത്തിക്കണ്ടത്തില്‍, മാര്‍ ബോസ്‌കോ പുത്തൂര്‍, മാര്‍ ജോര്‍ജ്‌ജ് പൊരുന്നേടം, മാര്‍ ജോസഫ്‌ കല്ലറങ്ങാട്ട്‌, മാര്‍ ജോര്‍ജ്‌ വലിയമറ്റം, മാര്‍ ജോര്‍ജ്‌ ഞറളക്കാട്ട്‌, മാര്‍ തോമസ്‌ പാടിയത്ത്‌, ജോസഫ്‌ മാര്‍ തോമസ്‌, വിന്‍സന്റ്‌ മാര്‍ പൗലോസ്‌, യൂഹന്നാന്‍ മാര്‍ തിയോഡോഷ്യസ്‌, തോമസ്‌ മാര്‍ ഐറെനിയോസ്‌, ഗീവര്‍ഗീസ്‌ മാര്‍ മക്കറിയോസ്‌, യൂഹന്നാന്‍ മാര്‍ അലക്‌സിയോസ്‌, യൂഹന്നാന്‍ മാര്‍ ക്രിസോസ്‌റ്റം, ഡോ. ജോര്‍ജ്‌ പള്ളിപ്പറമ്പില്‍,ഡോ. ജെയിംസ്‌ തോപ്പില്‍, ഡോ. അഗസ്‌റ്റിന്‍ മഠത്തിക്കുന്നേല്‍, ഡോ. ആന്റണി വളവുങ്കല്‍, ഡോ. ജെയിംസ്‌ ആനാപറമ്പില്‍, ഡോ. ആന്റണി കാട്ടിപ്പറമ്പില്‍, ഡോ.സെബാസ്‌റ്റ്യന്‍ തെക്കത്തേച്ചേരില്‍, ഡോ. സെല്‍വരാജ്‌ ദാസന്‍ തുടങ്ങിയ മെത്രാന്‍മാര്‍ ചടങ്ങില്‍ പങ്കാളികളായി. ക്‌നാനായ സഭയിലെ വൈദികര്‍ക്കു പുറമേ വിവിധ സഭകളില്‍ നിന്നുള്ള വികാരി ജനറാള്‍മാര്‍ ഉള്‍പ്പെടെയുള്ളവരും ശുശ്രൂഷകളില്‍ പങ്കെടുത്തു.
