കൊല്ലം:ഓച്ചിറയില്‍ 16 കാരിയെ ലൈംഗികമായി പീഡിപ്പിച്ച കേസില്‍ അറസ്റ്റിലായ പ്രമുഖ മതപ്രഭാഷകനും വ്ലോഗറുമായ മുഹമ്മദ് നിയാസ് ജൗഹരി കുറ്റം സമ്മതിക്കുന്ന നിർണായക ശബ്ദരേഖ പുറത്ത്.
കുറ്റകൃത്യം ചെയ്തതായി സമ്മതിക്കുന്ന പ്രതി, സംഭവം പുറത്തുപറയരുതെന്ന് അതിജീവിതയോട് ആവശ്യപ്പെടുകയും ഭീഷണിപ്പെടുത്തുകയും ചെയ്യുന്നത് ശബ്ദരേഖയില്‍ വ്യക്തമാണ്.
'ആര് ചോദിച്ചാലും മോള് ഒന്നും പറയരുതെന്നും, ഞാനും നീയും മരിച്ചാലും ഇത് പുറത്ത് പോകരുതെന്നും' കുട്ടിയോട് മുഹമ്മദ് നിയാസ് ആവശ്യപ്പെടുന്നു. പ്രതിയുടെ ഫോണില്‍ നിന്ന് തന്നെയാണ് കേസില്‍ നിർണായക വഴിത്തിരിവാകുന്ന ഈ തെളിവുകള്‍ അന്വേഷണ സംഘത്തിന് ലഭിച്ചത്.
കേസിന്റെ ആരംഭത്തില്‍ താൻ നിരപരാധിയാണെന്ന് വാദിച്ച നിയാസിന്റെ മൊബൈല്‍ ഫോണ്‍ കേന്ദ്രീകരിച്ച്‌ നടത്തിയ ശാസ്ത്രീയ പരിശോധനയിലാണ് ശബ്ദരേഖ ലഭിച്ചത്. ശബ്ദരേഖ പുറത്തുവന്നതോടെ പ്രതിക്കെതിരെയുള്ള പോക്‌സോ കേസിലെ തെളിവുകള്‍ കൂടുതല്‍ ശക്തമായിട്ടുണ്ട്. അറസ്റ്റിന് പിന്നാലെ ഓച്ചിറയില്‍ പ്രതി ഡയറക്ടറായി പ്രവർത്തിച്ചിരുന്ന ഹബീബിയ ഇസ്ലാമിക് അക്കാദമി അധികൃതർ അടച്ചുപൂട്ടി. നാല്‍പ്പതോളം കുട്ടികള്‍ പഠിച്ചിരുന്ന ഈ സ്ഥാപനം കേന്ദ്രീകരിച്ച്‌ കൂടുതല്‍ അന്വേഷണം നടത്താനാണ് പോലീസിന്റെ തീരുമാനം.
പ്രതിയുടെ പുറത്തുവന്ന ശബ്ദരേഖ:
'ഞാൻ ഈ വിഷയം വിട്ടു... മോളിനി ആരോടും ഇങ്ങനെ വെറുതെയെങ്കിലും ഇനി ഒന്നും പറയാൻ നില്‍ക്കണ്ട അത്രേയുള്ളൂ. മരണം വരെ, മരണം വരെ മോളുടെ വായില്‍ നിന്ന് ഒരാളും അറിയാതിരുന്നാല്‍ മതി. വിട്ടേരെ വിഷയം വിട്ടു. ഞാൻ പറഞ്ഞല്ലോ മോള് പറയില്ല അങ്ങനെ സംഭവിച്ചിട്ടുണ്ടെന്ന് എനിക്കറിയാം. ഇത് ഇങ്ങനെയൊരു സംശയം... അയാള്‍ പറഞ്ഞത് മോളുടെ സ്ഥലപ്പേര് വെച്ചിട്ട് അതുകൊണ്ട് മാത്രമാണ്. വിട്ടേരെ മരണം വരെ എന്റെ വായില്‍ നിന്ന് ഞാൻ ഇങ്ങനെ പറയുകയോ മോളിങ്ങനെ പറയുകയോ ആരൊക്കെ ഇനി എന്തൊക്കെ ചോദിച്ചാലും പറഞ്ഞാലും മോളും പറയണ്ട, വിട്ടേരെ അതോടെ തീർന്നു വിഷയം.ഇങ്ങനത്തെ ഒരു ആവശ്യം വന്നത് മാത്രമാണ് ഇടപെട്ടത് ഞാൻ. മോള് പറഞ്ഞില്ല വിട്ടുപോയി. ഇനി ആര് എന്ത് ആനയെ കൊണ്ട് വന്നാലും എനിക്ക് ഒരു പ്രശ്നവുമില്ല ഒരു ബേജാറുമില്ല കഴിഞ്ഞു അത്. അത് ഞാൻ പറഞ്ഞില്ലേ എനിക്ക് ജീവിതത്തില്‍ സംഭവിച്ച ഒരു കാര്യം നമ്മള്‍ക്ക് പങ്കുള്ള ഒരുകാര്യം. വേറെ ഇനി ആര് തലകുത്തി നിന്നാലും എനിക്ക് യാതൊരു ബേജാറുമില്ല അങ്ങനെ ഒരു സംഭവം ഉണ്ടായിട്ടേയില്ല.'
