കൊല്ലം: നിയമസഭാ തെരഞ്ഞെടുപ്പില് കെ എൻ ബാലഗോപാലിൻ്റെ വിജയത്തിനായി പ്രചാരണ വീഡിയോ ഇറക്കിയെന്ന പരാതിയില് ഇടത് അനുകൂലികളായ നാല് പൊലീസുകാർക്ക് സ്ഥലം മാറ്റം.
കൊല്ലം റൂറല് ജില്ലയിലെ സീനിയർ സിവില് പൊലീസ് ഓഫീസർ, സിവില് പൊലീസ് ഓഫീസർ റാങ്കിലുള്ളവരെ ജില്ലയ്ക്ക് പുറത്തേക്കാണ് സ്ഥലം മാറ്റിയത്. കൊട്ടാരക്കരയില് യുഡിഎഫ് സ്ഥാനാർത്ഥിയായിരുന്ന അയിഷ പോറ്റി ഡിജിപിക്കും തെരഞ്ഞെടുപ്പ് കമ്മീഷനും നല്കിയ പരാതിയില് ദക്ഷിണ മേഖല ഐജിയുടെ നിർദേശപ്രകാരം കൊല്ലം റൂറല് എസ്പിയാണ് നടപടിയെടുത്തത്.
സീനിയർ സിവില് പൊലീസ് ഓഫീസർമാരായ നജീം എസ്, സുജിത്ത് എസ് എല്, സിവില് പൊലീസ് ഓഫീസർമാരായ ശിവേഷ് എ എസ്, ചിന്തു വി എന്നിവരെ ആണ് സ്ഥലം മാറ്റിയത്. നജീം, ശിവേഷ് എന്നിവരെ കോട്ടയത്തേക്കും സുജിത്ത്, ചിന്തു എന്നിവരെ ആലപ്പുഴയിലേക്കുമാണ് മാറ്റിയത്. കെ എൻ ബാലഗോപാലിൻ്റെ വികസന പ്രവർത്തനങ്ങളെക്കുറിച്ച് തയ്യാറാക്കിയ വീഡിയോയില് നടപടി നേരിട്ട പൊലീസുകാരുടെ പ്രതികരണങ്ങള് ഉണ്ടായിരുന്നു. റൂറല് എസ്പി ഓഫീസിൻ്റെ വികസനത്തെക്കുറിച്ചായിരുന്നു പ്രതികരണം.
