കൊച്ചി: കേരള മെഡിക്കല് സര്വീസസ് കോര്പ്പറേഷന് ലിമിറ്റഡ് (കെ.എം.എസ്.സി.എല്.) വഴി വിതരണം ചെയ്ത മരുന്നുകള്ക്ക് ആവശ്യമായ ഗുണനിലവാരമില്ലെന്ന് കണ്ടെത്തിയതിനെ തുടര്ന്ന് കര്ശന നടപടിയുമായി സര്ക്കാരും ആരോഗ്യവകുപ്പും.
കെ.എം.എസ്.സി.എല്ലിലെ ക്വാളിറ്റി കണ്ട്രോള് വിഭാഗം പൂര്ണ്ണമായി നിര്ത്തലാക്കാന് നിര്ദ്ദേശം നല്കി. കെ.എം.എസ്.സി.എല്. വാങ്ങുന്ന മരുന്നുകളുടെ നിലവാരം പരിശോധിച്ചിരുന്നത് സ്ഥാപനത്തിനുള്ളിലെ ക്വാളിറ്റി കണ്ട്രോള് വിഭാഗം തന്നെയായിരുന്നു. ഈ വിഭാഗത്തിന്റെ ഭാഗത്തുനിന്നുണ്ടായ ഗുരുതരമായ വീഴ്ചയാണ് നിലവാരമില്ലാത്ത മരുന്നുകള് വിതരണത്തിനെത്താന് കാരണമെന്ന് വ്യക്തമായതോടെയാണ് അടിയന്തര നടപടി.
സംസ്ഥാനത്തെ സര്ക്കാര് ആശുപത്രികളിലേക്ക് കോടിക്കണക്കിന് രൂപയുടെ മരുന്നുകളാണ് കെ.എം.എസ്.സി.എല്. വഴി സംഭരിക്കുകയും വിതരണം ചെയ്യുകയും ചെയ്യുന്നത്. എന്നാല് ഇവയില് ഭൂരിഭാഗം മരുന്നുകള്ക്കും ഗുണനിലവാരമില്ലെന്ന് അടുത്തിടെ നടത്തിയ പരിശോധനകളില് കണ്ടെത്തിയിരുന്നു.
ഇതോടെ മരുന്നുകളുടെ ഗുണനിലവാരം ഉറപ്പാക്കാനുള്ള പൂര്ണ്ണ ചുമതല ഡ്രഗ്സ് കണ്ട്രോള് വകുപ്പിന് കൈമാറി. ഡ്രഗ്സ് കണ്ട്രോള് വകുപ്പില് പരിശോധനകള്ക്കായി ജീവനക്കാരുടെ കുറവുള്ളതിനാല് താല്ക്കാലിക നിയമനങ്ങള് നടത്തി പ്രതിസന്ധി പരിഹരിക്കാനും തീരുമാനമായിട്ടുണ്ട്.
