കോഴിക്കോട്: നാദാപുരം തൂണേരിയിലെ വീട്ടില് നിന്ന് കാണാതായ പെരിങ്ങത്തൂർ സ്വദേശിനിയെ മോന്താല് പുഴയില് മരിച്ച നിലയില് കണ്ടെത്തി.
ഇക്കഴിഞ്ഞ 10-ാം തീയതി മുതല് കാണാതായിരുന്ന പെരിങ്ങത്തൂർ സ്വദേശിനി മുംതാസിനെ (50) യാണ് മോന്താല് പുഴയില് മരിച്ച നിലയില് കണ്ടെത്തിയത്. തൂണേരിയിലെ സഹോദരിയുടെ വീട്ടില് താമസിക്കുകയായിരുന്നു മുംതാസ്.
10-ാം തീയതി വീട്ടില് നിന്ന് പുറത്തേക്ക് പോയതിന് ശേഷം തിരിച്ചെത്തിയില്ല. ഇതേ തുടർന്ന് ബന്ധുക്കള് നല്കിയ പരാതിയില് നാദാപുരം പോലീസ് കേസെടുത്ത് അന്വേഷണം ആരംഭിച്ചിരുന്നു. പോലീസും നാട്ടുകാരും ചേർന്ന് വിവിധ സ്ഥലങ്ങളില് തിരച്ചില് നടത്തുന്നതിനിടെയാണ് ഇന്ന് മോന്താല് പുഴയില് മുംതാസിന്റെ മൃതദേഹം കണ്ടെത്തിയത്.
ഉടൻ തന്നെ മൃതദേഹം പുറത്തെടുത്ത് ആശുപത്രിയിലേക്ക് മാറ്റി. നാദാപുരം പൊലീസ് മൃദദേഹം ഇൻക്വസ്റ്റ് നടത്തി. തലശ്ശേരി ഗവ. ജില്ലാ ആശുപത്രിയില് പോസ്റ്റ് മോട്ടം നടപടികള് തുടങ്ങി. മരണകാരണം സംബന്ധിച്ച് പോസ്റ്റ്മോർട്ടം റിപ്പോർട്ട് ലഭിച്ച ശേഷം മാത്രമേ വ്യക്തമാകൂ എന്ന് പോലീസ് അറിയിച്ചു.
