തിരുവനന്തപുരം : കേരളത്തിലെ ആരോഗ്യവകുപ്പിനെ കഴിഞ്ഞ 10 വർഷം താൻ വിമർശിച്ചിട്ടുണ്ടെന്നും, നിലവിൽ താൻ ശ്രമിക്കുന്നത് അത് ആവർത്തിക്കാതിരിക്കാൻ ആണെന്നും ആരോഗ്യവകുപ്പ് മന്ത്രി കെ മുരളീധരൻ. ആരോഗ്യവകുപ്പിൽ കഴിഞ്ഞ അഞ്ചുമാസത്തിനുള്ളിൽ നിരവധി പദ്ധതികൾക്ക് തുടക്കം കുറിച്ചെന്നും മന്ത്രി വ്യക്തമാക്കി.
രോഗികളെ നിലത്ത് കിടത്തുന്നത് ഒഴിവാക്കാനായി. ആരോഗ്യവകുപ്പിലെ പോരായ്മകൾ വസ്തുനിഷ്ഠമായി പരിശോധന നടത്തി പരിഹരിക്കുമെന്നും മന്ത്രി പറഞ്ഞു. കഴിഞ്ഞ പത്തുവർഷത്തെ എന്റെ വിമർശനം ഉത്തരവാദിത്വത്തോട് കൂടിയുള്ളത്. ഞാൻ നോക്കുന്നത് വിമർശനങ്ങൾ വന്നപ്പോൾ എന്ത് നടപടിയാണ് കഴിഞ്ഞ പത്തുവർഷം ആരോഗ്യവകുപ്പ് സ്വീകരിച്ചത്. ഒരു വാർത്ത ലഭിച്ചാൽ അതിൽ അന്വേഷണം നടത്താതെ തീരുമാനമെടുക്കുന്നത് ശരിയല്ല. പരിയാരം മെഡിക്കൽ കോളേജിലെ ചികിത്സ പിഴവിൽ അവരുടെ ബന്ധുക്കൾക്കല്ല പരാതി, മറ്റു ചിലർക്കാണ് അതിന്റെ ഉദ്ദേശം വേറെ. അത്യാവശ്യം വേണ്ട എല്ലാ മരുന്നുകളും ലഭ്യമാക്കിയിട്ടുണ്ടെന്നും അദ്ദേഹം വ്യക്തമാക്കി.
കഴിഞ്ഞ 10 വർഷം ആരോഗ്യ വകുപ്പിനെ താൻ കല്ലെറിഞ്ഞിരുന്നുവെന്ന് ആരോഗ്യമന്ത്രി കെ മുരളീധരൻ നേരത്തെ പറഞ്ഞിരുന്നു. കല്ലേറ് തിരിച്ചു കിട്ടുമ്പോഴാണ് അത് ബോധ്യമാകുന്നത് എന്നും കെ മുരളീധരൻ. മെഡിക്കൽ കോളേജിലെ ബിരുദദാന ചടങ്ങിൽ വെച്ചായിരുന്നു ആരോഗ്യ മന്ത്രിയുടെ പ്രതികരണം.നിങ്ങളൊക്കെ പഠിച്ച് ഇറങ്ങുമ്പോൾ സർക്കാരാണ് പഠിപ്പിച്ചത് എന്ന് മറക്കരുതെന്ന് വിദ്യാർഥികളോട് പറഞ്ഞ മന്ത്രി കല്ലേറ് കൊള്ളാൻ വിധിക്കപ്പെട്ട വകുപ്പ് ആണ് നമ്മുടേതെന്നും പറഞ്ഞു.
