കൊച്ചി: ബോഡി ബില്‍ഡിങ് താരങ്ങളായ ചിത്തരേശ് നടേശന്‍, ഷിനു ചൊവ്വ എന്നിവരുടെ പൊലീസ് നിയമന വിവാദത്തില്‍ ആരോപണങ്ങളില്‍ നേരിട്ട് അന്വേഷണത്തിന് ഉത്തരവിടാതെ ഹൈക്കോടതി.
വിജിലന്‍സ് അന്വേഷണം നടത്താനുള്ള മുന്‍കൂര്‍ അനുമതി സര്‍ക്കാര്‍ നിഷേധിച്ചിട്ടുണ്ട്. ആ സര്‍ക്കാര്‍ ഉത്തരവ് റദ്ദാക്കണമെന്ന ആവശ്യം ഹര്ജിക്കാരന് ഉന്നയിച്ചിട്ടില്ല. അതിനെതിരെ ഹര്ജിക്കാരന് നിയമപരമായി നീങ്ങാം.
ചട്ടലംഘനം മാത്രം അഴിമതിയായി കണക്കാക്കാന്‍ സാധിക്കില്ലെന്ന് കോടതി ചൂണ്ടിക്കാട്ടി. ഇതോടെ ആംഡ് പൊലീസ് ഇന്‍സ്പെക്ടര്‍മാരുടെ സ്‍പോര്‍ട്സ് ക്വട്ട നിയമനത്തിലെ ക്രമക്കേടില്‍ വിജിലന്‍സ് അന്വേഷണം ആവശ്യപ്പെട്ടുള്ള ഹര്‍ജി ഹൈക്കോടതി തീര്‍പ്പാക്കി.
ബോഡി ബില്‍ഡര്‍മാരായ ചിത്തരേശ് നടേശന്‍, ഷിനു ചൊവ്വ എന്നിവരുടെ നിയമനത്തില്‍ അന്നത്തെ എഡിജിപി എസ് ശ്രീജിത്ത് ചട്ടവിരുദ്ധമായി ഇടപെട്ടു എന്നായിരുന്നു ഹര്‍ജിക്കാരന്‍റെ വാദം.
ചിത്തരേശിന് ഫ്ലാറ്റ് ഫൂട്ട് ഉള്ളതിനാല്‍ നിയമനത്തിന് അയോഗ്യനാണെന്നും ഹര്‍ജിയില്‍ ചൂണ്ടിക്കാട്ടിയിരുന്നു.
രഹസ്യ പരിശോധനയില്‍ ക്രമക്കേട് കണ്ടെത്തിയിട്ടും അഴിമതി നിരോധന നിയമപ്രകാരം കേസെടുക്കുന്നില്ലെന്നാണ് ഹര്‍ജിക്കാരനായ അസ്വക്കറ്റ് കെ.എം.ഷാജഹാന്‍ കോടതിയെ അറിയിച്ചത്. ജസ്റ്റിസ് എ ബദറുദ്ദിനാണ് ഹര്‍ജി തീര്‍പ്പാക്കിയത്.
