വിഴിഞ്ഞം: ഓസ്ട്രേലിയയില്‍ ജോലി വാങ്ങിനല്‍കാമെന്നു വാഗ്ദാനം ചെയ്ത് സ്ത്രീകളില്‍നിന്ന് 21 ലക്ഷം കൈപ്പറ്റിയശേഷം കബളിപ്പിച്ച പരാതിയില്‍ രണ്ടുപേരെ വിഴിഞ്ഞം പോലീസ് അറസ്റ്റ് ചെയ്തു.
തൃശൂർ ചാലക്കുടി മുരിങ്ങൂർ തെക്കുമുറി കോനൂർ നാലുകെട്ടില്‍ കടവിള വീട്ടില്‍ ഷഫീഖ് (49), മലപ്പുറം നിലമ്പൂർ പാടികുളത്തുംപടി വീട്ടില്‍ സപ്ന (32) എന്നിവരാണ് അറസ്റ്റിലായത്.
വിഴിഞ്ഞം സ്വദേശികളായ മേരി ഗ്ലാൻസ്, അജിത എന്നിവരെയാണ് സംഘം പറ്റിപ്പിനിരയാക്കിയത്. ഒരു ഇടനിലക്കാരൻ മുഖാന്തിരമാണ് യുവതികള്‍ പ്രതികളുമായി ബന്ധപ്പെടുന്നത്. നിരവധി പേരെ ഓസ്ട്രേലിയയിലേക്ക് കയറ്റി അയച്ചിട്ടുണ്ടെന്നു പറഞ്ഞുവിശ്വസിച്ച ഷഫീഖും സപ്നയും ചേർന്ന് ഇക്കഴിഞ്ഞ ഏപ്രിലില്‍ 21 ലക്ഷം കൈക്കലാക്കിയെന്നാണ് പരാതി.
പറഞ്ഞ അവധികളെല്ലാം കഴിഞ്ഞതോടെ തട്ടിപ്പുമനസിലാക്കിയ യുവതികള്‍ വിഴിഞ്ഞം പൊലിസില്‍ പരാതി നല്‍കി. നിരവധി തട്ടിപ്പുകേസുകളിലെ പ്രതികളാണ് ഇരുവരുമെന്ന് വിഴിഞ്ഞം പോലീസ് അറിയിച്ചു. കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.
