ബെംഗളൂരു: ലഖ്നൗവില് നിന്ന് ബെംഗളൂരുവിലേക്ക് സര്വീസ് നടത്തിയ ഇന്ഡിഗോ വിമാനത്തില് ബോംബ് ഭീഷണി.
ബുധനാഴ്ച വിമാനത്തിനുള്ളില് ടിഷ്യു പേപ്പറില് എഴുതിയ നിലയില് ഭീഷണിക്കുറിപ്പ് കണ്ടെത്തുകയായിരുന്നു.
സംഭവത്തെ തുടര്ന്ന് സുരക്ഷാ ഏജന്സികള് വിമാനത്തില് വിശദമായ പരിശോധന നടത്തി.
6E231 എന്ന നമ്പറില് സര്വീസ് നടത്തിയ വിമാനത്തിന്റെ യാത്രയുടെ അവസാനഘട്ടത്തിലാണ് ഭീഷണിക്കുറിപ്പ് കണ്ടെത്തിയത്. തുടര്ന്ന് വിമാനം സുരക്ഷിതമായി ബെംഗളൂരുവില് ലാന്ഡ് ചെയ്തു. കുറിപ്പ് കണ്ടെത്തിയതോടെ മുന്കരുതല് നടപടികളുടെ ഭാഗമായി സുരക്ഷാ ഉദ്യോഗസ്ഥര് വിമാനത്തില് പരിശോധന നടത്തി.
ഭീഷണിക്കുറിപ്പ് എഴുതിയത് ആരാണെന്നോ സംഭവത്തിന് പിന്നിലെ സാഹചര്യങ്ങളോ ഇതുവരെ വ്യക്തമായിട്ടില്ല. വിമാനത്തില് യഥാര്ഥത്തില് എന്തെങ്കിലും സുരക്ഷാഭീഷണിയുണ്ടായിരുന്നോയെന്നും അധികൃതര് പരിശോധിച്ചുവരികയാണ്. സംഭവത്തില് കൂടുതല് അന്വേഷണം തുടരുകയാണ്.
അടുത്തിടെ ഇന്ഡിഗോ വിമാനത്തിന് സാങ്കേതിക തകരാര്
ഓഗസ്റ്റ് 20ന് ഡല്ഹിയില്നിന്ന് മംഗളൂരുവിലേക്ക് സര്വീസ് നടത്തിയ ഇന്ഡിഗോ വിമാനവും സാങ്കേതിക തകരാറിനെ തുടര്ന്ന് യാത്രക്കാരെ ആശങ്കയിലാക്കിയിരുന്നു. 6E6456 വിമാനം ടാക്സിയിങ്ങിനിടെ സാങ്കേതിക തകരാര് കണ്ടെത്തിയതിനെ തുടര്ന്ന് പൈലറ്റ് വിമാനം ബേയിലേക്ക് തിരിച്ചുകൊണ്ടുവരികയായിരുന്നു.
വൈകിട്ട് 5.30ന് പുറപ്പെടേണ്ടിയിരുന്ന വിമാനം ഏകദേശം മൂന്ന് മണിക്കൂറിന് ശേഷമാണ് യാത്ര തുടര്ന്നത്. തകരാര് കണ്ടെത്തിയതിനെ തുടര്ന്ന് യാത്രക്കാരെ വിമാനത്തില്നിന്ന് ഇറക്കുകയും പകരം വിമാനം ഒരുക്കുകയും ചെയ്തു.
സുരക്ഷാ നടപടികളുടെ ഭാഗമായി തകരാറിലായ വിമാനത്തില് ആവശ്യമായ പരിശോധനകളും അറ്റകുറ്റപ്പണികളും നടത്തിയ ശേഷമേ അത് വീണ്ടും സര്വീസില് പ്രവേശിപ്പിക്കുകയുള്ളൂവെന്ന് ഇന്ഡിഗോ അറിയിച്ചിരുന്നു.
