ഇടുക്കി : കനത്ത മഴ തുടരുന്ന സാഹചര്യത്തിൽ ഇടുക്കി ജില്ലയുടെ മലയോര മേഖലയില് ദേശീയപാത 85ല് നേര്യമംഗലം മുതല് അടിമാലി വരെ വാഹനഗതാഗതം പൂർണമായും നിരോധിച്ചു. മണ്ണിടിച്ചിലിന് ഉയർന്ന സാധ്യതയുള്ളതിനാലാണ് ദുരന്തനിവാരണ വിഭാഗം അടിയന്തര നിയന്ത്രണം ഏർപ്പെടുത്തിയത്.
ഗതാഗത നിയന്ത്രണം ഉടൻ നടപ്പാക്കാൻ പോലീസിന് നിർദേശം നല്കിയിട്ടുണ്ട്. ഈ ഭാഗത്തേക്കുള്ള യാത്രകള് പരമാവധി ഒഴിവാക്കണമെന്നും അത്യാവശ്യ സാഹചര്യം ഇല്ലെങ്കില് മലയോര മേഖലയിലേക്ക് യാത്ര ചെയ്യരുതെന്നും അധികൃതർ പൊതുജനങ്ങളോട് അഭ്യർഥിച്ചു. അതേസമയം, കനത്ത മഴയും പ്രകൃതിക്ഷോഭ സാധ്യതയും കണക്കിലെടുത്ത് ഇടുക്കി ജില്ലയിലെ എല്ലാ വിനോദസഞ്ചാര പ്രവർത്തനങ്ങളും നേരത്തെ തന്നെ ജില്ലാ കളക്ടർ നിരോധിച്ചിരുന്നു. പുതിയ ഉത്തരവ് ഉണ്ടാകുന്നതുവരെ ഈ നിയന്ത്രണം തുടരുമെന്നും ജില്ലാ ഭരണകൂടം അറിയിച്ചു.
സംസ്ഥാനത്ത് ശക്തമായ മഴ തുടരുന്നതിനാല് മലയോര മേഖലകളില് മണ്ണിടിച്ചില്, ഉരുള്പൊട്ടല്, മരങ്ങള് കടപുഴകിവീഴല് തുടങ്ങിയ അപകടസാധ്യതകള് നിലനില്ക്കുകയാണ്. അതിനാല് കാലാവസ്ഥാ മുന്നറിയിപ്പുകള് കൃത്യമായി പാലിക്കാനും അധികൃതരുടെ നിർദേശങ്ങള് അനുസരിക്കാനും ദുരന്തനിവാരണ വിഭാഗം വീണ്ടും നിർദേശിച്ചു.
