കോഴിക്കോട്: വടകരയില് അധ്യാപികമാർ പ്രതികളായ എംഡിഎംഎ പണമിടപാട് കേസിലെ അന്വേഷണം ഊർജിതമാക്കി പ്രത്യേക അന്വേഷണസംഘം.
അധ്യാപികമാരുമായി ലക്ഷങ്ങളുടെ പണമിടപാട് നടത്തിയവരെ കണ്ടെത്തി ആദ്യം കസ്റ്റഡിയിലെടുക്കാനാണ് പൊലീസിന്റെ നീക്കം.
കേസിലെ പ്രധാന പ്രതികളില് ഒരാളായ പേരാമ്പ്ര ബിആർസി സ്പെഷ്യലിസ്റ്റ് അധ്യാപിക കീർത്തനയുടെ ജാമ്യാപേക്ഷ വടകര എൻഡിപിഎസ് കോടതി ഇന്ന് പരിഗണിക്കും.
സാമ്പത്തിക ഇടപാടുകള് നടത്തിയ കീർത്തന, കാവ്യ, നീഷ്മ എന്നീ അധ്യാപികമാരുടെ ബാങ്ക് അക്കൗണ്ട് വിവരങ്ങളും ഫോണ് കോള് ഡീറ്റൈല്സും ശേഖരിക്കുന്ന നടപടികള് ആരംഭിച്ചു. കോടതിയില് സമർപ്പിക്കാനുള്ള റിപ്പോർട്ടിന്റെ ഭാഗമായി ശാസ്ത്രീയ തെളിവ് ശേഖരണവും അന്വേഷണ സംഘം തുടങ്ങി.
എടിഎം വഴി പണം പിൻവലിച്ചതടക്കമുള്ള ഇടപാടുകള് സംബന്ധിച്ച വിവരങ്ങളും പരിശോധിക്കുന്നുണ്ട്. എടിഎം കൗണ്ടറില് നിന്ന് കാർഡ് ഉപയോഗിച്ച് പണം പിൻവലിച്ചവരുടെ സിസിടിവി ദൃശ്യങ്ങള് പരിശോധിക്കാൻ അനുമതി തേടി അന്വേഷണ സംഘം ബാങ്കുകള്ക്ക് കത്ത് നല്കിയിട്ടുണ്ട്.
ഇതുവഴി പണം പിൻവലിച്ചയാളെ കണ്ടെത്തുകയാണെങ്കില് അവരെയും കേസില് പ്രതിയാക്കും. ആയിരക്കണക്കിന് ഫോണ് കോളുകളാണ് സൈബർ സെല് സഹായത്തോടെ പൊലീസ് പരിശോധിച്ചു കൊണ്ടിരിക്കുന്നത്.
എംഡിഎംഎ കേസില് ലഭിച്ച പണം മുഴുവൻ വയനാട് സ്വദേശിയുടെ ബാങ്ക് അക്കൗണ്ടിലേക്കാണ് പോയതെന്ന് അന്വേഷണ സംഘം കണ്ടെത്തി. ലഹരിയുടെ മൊത്ത വിതരണക്കാരനാണ് ഈ യുവാവെന്നാണ് നിഗമനം. ഇയാളെക്കുറിച്ചുള്ള വിവരങ്ങള് അന്വേഷണ സംഘത്തിന് ലഭിച്ചിട്ടുണ്ട്.
സൈബർ സെല്ലിന്റെ സഹായത്തോടെ ഇയാളെ കണ്ടെത്താനുള്ള ശ്രമം തുടരുകയാണ്. ഇയാളെ പിടികൂടിയ ശേഷം മാത്രമേ ജുഡീഷ്യല് കസ്റ്റഡിയിലുള്ള പ്രതികളെ കസ്റ്റഡിയില് വാങ്ങി വിശദമായി ചോദ്യം ചെയ്യാൻ പൊലീസ് കോടതിയില് അപേക്ഷ സമർപ്പിക്കുകയുള്ളൂ.
ലഹരി ഇടപാടിന് പിന്നില് വലിയ ശൃംഖല പ്രവർത്തിക്കുന്നുണ്ടെന്ന സംശയത്തിലാണ് അന്വേഷണ സംഘം.
