പത്തനംതിട്ട: പരിസ്ഥിതിലോല പ്രദേശ (ഇ.എസ്.ഇസഡ്) വിജ്ഞാപനവുമായി ബന്ധപ്പെട്ട് ഒക്ടോബർ 24-ന് പത്തനംതിട്ട ജില്ലയില്‍ എല്‍.ഡി.എഫ് പ്രഖ്യാപിച്ച ഹർത്താലില്‍ യാതൊരു മാറ്റവുമില്ലെന്ന് സി.പി.എം ജില്ലാ സെക്രട്ടറി രാജു എബ്രഹാം വ്യക്തമാക്കി.
ജില്ലയിലെ ഏഴ് വില്ലേജുകള്‍ വിജ്ഞാപനത്തില്‍ ഉള്‍പ്പെട്ടിട്ടും അതില്‍ ഒന്നപോലും ഒഴിവാക്കാൻ കേന്ദ്രസർക്കാർ തയ്യാറായിട്ടില്ലെന്നും ഇതില്‍ പ്രതിഷേധിച്ചാണ് ഹർത്താല്‍ നടത്തുന്നതെന്നും അദ്ദേഹം അറിയിച്ചു. ജനങ്ങള്‍ വെറുംകയ്യോടെ ഇറങ്ങിപ്പോകണമെന്നാണോ റാന്നി എം.എല്‍.എ പറയുന്നതെന്ന് ചോദിച്ച രാജു എബ്രഹാം, ഹർത്താലിനെ റാന്നി എം.എല്‍.എ എതിർക്കുന്നത് എന്തുകൊണ്ടാണെന്ന് വ്യക്തമല്ലെന്നും കൂട്ടിച്ചേർത്തു.അതേസമയം, എല്‍.ഡി.എഫിന്റെ ഹർത്താല്‍ ആഹ്വാനത്തെ രൂക്ഷമായി വിമർശിച്ച്‌ പഴകുളം മധു എം.എല്‍.എ രംഗത്തെത്തി. സർക്കാർ സമർപ്പിക്കുന്ന അന്തിമ റിപ്പോർട്ടിനെതിരെ തന്നെയാണ് ഇവർ ഹർത്താല്‍ പ്രഖ്യാപിച്ചിരിക്കുന്നതെന്നും ഇത് ജനങ്ങളെ വഞ്ചിക്കാനാണെന്നും അദ്ദേഹം ആരോപിച്ചു. വിഷയത്തില്‍ അടിയന്തര പ്രമേയം പോലും നിയമസഭയില്‍ കൊണ്ടുവരാൻ ഇടതുമുന്നണി തയ്യാറായിട്ടില്ലെന്നും കേരളത്തിലെ മറ്റ് ജില്ലകളിലൊന്നും ഇത്തരത്തില്‍ ഹർത്താല്‍ ഇല്ലെന്നും പഴകുളം മധു ചൂണ്ടിക്കാട്ടി.അതിനിടെ, പരിസ്ഥിതിലോല മേഖലയും ഭൂപ്രശ്നങ്ങളും ഉന്നയിച്ച്‌ ഇടുക്കി ജില്ലയില്‍ സി.പി.എം ആഹ്വാനം ചെയ്ത ഹർത്താല്‍ പൂർണമായിരുന്നു.
പലയിടത്തും ഹർത്താല്‍ അനുകൂലികള്‍ വാഹനങ്ങള്‍ തടഞ്ഞു. സി.എച്ച്‌.ആർ പ്രദേശം വനഭൂമിയാക്കി മാറ്റുന്നതിനുള്ള ഗൂഢനീക്കം തിരിച്ചറിയുക, ആനത്താരകള്‍ സൃഷ്ടിക്കുന്നതിനുള്ള നീക്കം ഉപേക്ഷിക്കുക തുടങ്ങിയ ആവശ്യങ്ങള്‍ ഉന്നയിച്ചായിരുന്നു ഹർത്താല്‍. പരിസ്ഥിതി ലോല മേഖലയായി നിർണയിക്കപ്പെട്ട പ്രദേശങ്ങളുടെ കാഡസ്ട്രല്‍ മാപ്പില്‍ വ്യക്തതയില്ലെന്നാണ് സി.പി.എമ്മിന്റെ പ്രധാന ആരോപണം.
