ആലപ്പുഴ : ഹരിപ്പാട്ടെ രണ്ട് വയസുകാരന്റെ മരണത്തിന് പിന്നാലെ ദമ്പതികളുടെ നവജാത ശിശുവിനെ ശിശുക്ഷേമ സമിതി ഏറ്റെടുക്കുന്നതിൽ പ്രതിസന്ധി. നവജാത ശിശുവിനെ ശിശുക്ഷേമ സമിതിക്ക് വിട്ടു നൽകില്ലെന്ന് മാതാവ് താര നിലപാടെടുത്തതോടെയാണ് പ്രതിസന്ധി. അതേസമയം ദമ്പതികളുടെ കുഞ്ഞുങ്ങളെ ശിശുക്ഷേമ സമിതി ഏറ്റെടുക്കുന്നതിനെ മാതാവ് നേരത്തെ എതിർത്ത ദൃശ്യങ്ങൾ പുറത്തുവന്നു.
ഗാന്ധിഭവനിൽ നിന്ന് അവധിക്ക് കൊണ്ടുപോയ കുട്ടികളെ തിരികെ കൊണ്ടുപോകാൻ എത്തിയ ഉദ്യോഗസ്ഥരെ മാതാവ് താര ഭീഷണിപ്പെടുത്തുന്നതാണ് ദൃശ്യങ്ങൾ. രണ്ട് വയസുകാരന്റെ മരണത്തിന് ഒരാഴ്ചയ്ക്ക് മുൻപുള്ള ദൃശ്യങ്ങളാണ് പുറത്തുവന്നത്. രാജേഷ്-താര ദമ്പതികളുടെ രണ്ട് കുട്ടകൾ മരിക്കുകയും മറ്റു കുട്ടികളെ പരിചരിക്കുന്നില്ലെന്ന കണ്ടെത്തലുണ്ടാവുകയും ചെയ്തതോടെയാണ് നവജാത ശിശുവിനെ ഏറ്റെടുക്കാൻ ജില്ലാ ശിശുക്ഷേമ സമിതി തീരുമാനിച്ചത്.
എന്നാൽ, ഇതിന് മാതാവിന്റെ സമ്മതം വേണം. ഇന്നലെ അമ്മ താരയുമായി സിഡബ്ല്യുസി അധികൃതർ സംസാരിച്ചെങ്കിലും വിസമ്മതം അറിയിച്ചു. കുട്ടിയെ വിട്ടുതരില്ലെന്നും വീട്ടിലേക്ക് മടങ്ങണമെന്നുമാണ് താരയുടെ ആവശ്യം. ഇതിൽ സിഡബ്ല്യൂസി എതിർപ്പറിയിച്ചു. ജില്ലാ ചൈൽഡ് പ്രൊട്ടക്ഷൻ ഓഫീസറുടെ സോഷ്യൽ ഇൻവസ്റ്റിഗേഷൻ റിപ്പോർട്ടിന്റെ അടിസ്ഥാനത്തിൽ കുട്ടിയുടെ ഏറ്റെടുക്കലിനായി ഇടക്കാല ഉത്തരവ് പുറപ്പെടുവിക്കാനുള്ള സാധ്യത തേടുകയാണ് സിഡബ്ല്യൂസി.
രണ്ട് വയസുകാരന്റെ മരണം ഇന്നലയൊണ് അമ്മ താരയെ അറിയിച്ചത്. സ്വന്തം കുഞ്ഞ് മരിച്ചതറിഞ്ഞിട്ടും അമ്മയ്ക്ക് ഭാവവ്യത്യാസങ്ങളുണ്ടായിരുന്നില്ല. താരക്ക് ഉടൻ കൗൺസിലിംഗ് നൽകുമെന്ന് വണ്ടാനം മെഡിക്കൽ കോളേജ് അധികൃതർ അറിയിച്ചു.
