കോട്ടയം: മുടി കൊഴിച്ചില്‍ തടയാനും മുടിക്ക് നല്ല തിളക്കവും കരുത്തും നല്‍കാനും ഏറ്റവും മികച്ച വഴികളിലൊന്നാണ് ഉലുവ.
മാത്രമല്ല താരനും തലയോട്ടിലെ ചൊറിച്ചിലും അടക്കമുളള പ്രശ്നങ്ങള്‍ക്കും നല്ലൊരു പരിഹാരമാണ് ഉലുവ.
ഉലുവ ഹെയർ മാസ്ക് ആയും ഉലുവ ടോണർ ആയുമൊക്കെ ആളുകള്‍ മുടിക്കായി ഉപയോഗിക്കാറുണ്ട്. മുടി കൊഴിച്ചില്‍ തടയാൻ ഉലുവ ഹെയർ മാസ്ക് എങ്ങനെ തയ്യാറാക്കണമെന്നും എങ്ങനെ ഉപയോഗിക്കണമെന്നും നോക്കാം.
നിങ്ങളുടെ മുടിയുടെ നീളത്തിന് അനുസരിച്ച്‌ 2 മുതല്‍ 3 ടേബിള്‍ സ്പൂണ്‍ വരെ ഉലുവ എടുക്കുക. 2 ടേബിള്‍ സ്പൂണ്‍ തൈര് അല്ലെങ്കില്‍ കറ്റാർവാഴ ജെല്‍, മുടി വരണ്ടത് ആണെങ്കില്‍ 1 ടീസ്പൂണ്‍ വെളിച്ചെണ്ണ, ആവശ്യത്തിന് വെള്ളം എന്നിവ എടുക്കുക.
ഉലുവ ഒരു രാത്രി മുഴുവൻ അല്ലെങ്കില്‍ കുറഞ്ഞത് 6-8 മണിക്കൂർ വെള്ളത്തില്‍ കുതിർത്തു വയ്ക്കുക. കുതിർത്ത ഉലുവ രാവിലെ വെള്ളം കളഞ്ഞ ശേഷം മിക്സിയിലിട്ട് നല്ല പേസ്റ്റ് രൂപത്തില്‍ അരച്ചെടുക്കുക. ആവശ്യമെങ്കില്‍ അല്പം വെള്ളം ചേർക്കാം.
അരച്ചെടുത്ത ഉലുവ പേസ്റ്റിലേക്ക് 2 ടേബിള്‍ സ്പൂണ്‍ തൈരോ കറ്റാർവാഴ ജെല്ലോ ചേർത്ത് നന്നായി ഇളക്കുക. മുടിക്ക് നല്ല തിളക്കം കിട്ടാൻ അല്പം വെളിച്ചെണ്ണയും ചേർക്കാവുന്നതാണ്.
ഇത് തലയോട്ടിയിലും മുടിയുടെ വേരുകള്‍ മുതല്‍ അറ്റം വരെയും നന്നായി തേച്ചുപിടിപ്പിക്കുക. ഏകദേശം 30 മുതല്‍ 45 മിനിറ്റ് വരെ ഇത് തലയില്‍ വയ്ക്കുക.
അതിനുശേഷം വീര്യം കുറഞ്ഞ ഷാംപൂ ഉപയോഗിച്ച്‌ സാധാരണ വെള്ളത്തില്‍ മുടി നന്നായി കഴുകിക്കളയുക. ആഴ്ചയില്‍ ഒന്നോ രണ്ടോ തവണ നിങ്ങള്‍ക്ക് ഇത്തരത്തില്‍ ഉലുവ മാസ്ക് ഉണ്ടാക്കി ഉപയോഗിക്കാവുന്നതാണ്.
